ޣައްޒާއަށް އިޒްރާއީލުން ދެމުން އަންނަ ވައިގެ ހަމަލާތަކުގައި، ޣައްޒާގައި އަސީރުންގެ ގޮތުގައި ބަންދުކޮށްފައިވާ 50 ވުރެ ގިނަ މީހުން މަރުވެއްޖެކަމުގައި، ހަމާސްއިން ބުނެފިއެވެ. 

ފަލަސްޠީނުގެ މިނިވަންކަމަށް ޖިހާދުކުރަމުން އަންނަ މުޖާހިދުންގެ ޖަމާޢަތް ހަމާސްއިން ބުނެފައި ވަނީ، އިޒްރޭލުން ދެމުން އަންނަ ހަމަލާތަކުގައި، ޣައްޒާގެ އެކި ސަރަހައްދުތަކުގައި ބަންދުކޮށްފައިވާ، އިޒްރޭލު މީހުންގެ ތެރެއިން މިހާތަނަށް 50 ވުރެ ގިނަ މީހުން އިޒްރޭލުގެ ހަމަލާތަކުގައި މަރުވެފައިވާ ކަމަށެވެ. އަދި މަރުވި މީހުން ދެނެގަތުމުގެ މަސައްކަތްތައް ކުރަމުންދާކަމުގައިވެސް ހަމާސްއިން ވަނީ ބުނެފައެވެ.

އޮކްޓޫބަރު މަހުގެ 7 ވަނަ ދުވަހު ހަމާސް ޖަމާއަތުން ވަނީ، ޣައްޒާ ބަންދުކުރުމަށް، އިޒްރޭލުން ޖަހާފައިވާ ޣައިރު ޤާނޫނީ ފެންސު ހަލާކުކޮށްލައި، އިޒްރޭލުން ހިފާފައިވާ ފަލަސްޠީނުގެ ބިންތަކުގައި ހަދާފައިވާ ޔަހޫދީ އާބާދީތަކުގެ ތެރެއަށް ވަދެގެންފައެވެ. މިގޮތުން ފަލަޞްތީނުގެ ހިފާފައިވާ ދެކުނުގެ ސަރަހައްދެއްގައި ބޭއްވި މިޔުޒިކް ފެސްޓިވަލެއްގެ ތެރެއިންނާއި، އަވަށްތަކުން ގިނަ ބަޔަކު ހައްޔަރުކޮށް އަސީރުންގެ ގޮތުގައި، ޣައްޒާއަށް ގެންގޮސްފައިވެއެވެ.

އަސީރުންގެ ގޮތުގައި ހަމާސްއިން ޣައްޒާއަށް ގެންދިޔަ އިޒްރޭލު މީހުންގެ ތެރެއިން އުމުރުން ދުވަސްވީ ދެ މީހަކާއި، އެމެރިކާއަށް ނިސްބަތްވާ އަންހެނަކާއި އޭނާގެ ދަރިފުޅު މިހާރު ވަނީ މިނިވަންކޮށްފައެވެ.