މިއީ ހަމާސް އާއި އިސްރާއީލު ސިފައިންނާ ދެމެދު ކުރިޔަށްދާ ހަނގުރާމައިގެ 19 ވަނަ ދުވަސް، 25 އޮކްޓޯބަރ 2023ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 ޣައްޒާގެ ސިއްހީ ނިޒާމު އޮތީ މުޅިން ފުނޑުފުނޑުވެފައިކަމަށް ފަލަސްތީނުގެ ހެލްތު މިނިސްޓްރީން ބުނެފި. މިކަމާ ގުޅިގެން ޣައްޒާގެ އުތުރުގެ ކަމާލް އަދްވާން ހޮސްޕިޓަލުގެ ޑޮކްޓަރަކު ބުނީ، އެ ހޮސްޕިޓަލް ވެސް މިހާރު އޮތީ ސަހަރާއަކަށް ބަދަލުވުމުގެ މަގުމަތީގައިކަމަށް. އަދި ފަލަސްތީނުގެ ރެފިއުޖީންނާ ބެހޭ އ.ދ.ގެ އެޖެންސީން ބުނާ ގޮތުގައި ޣައްޒާގެ ތެޔޮ ހުސްވެ، ހޮސްޕިޓަލްތަކާއި އެހެނިހެން ސިއްހީ ވަސީލަތްތައް މުޅިން ހުއްޓުމަކަށް އައުމަށް އޮތީ ކުޑަ ވަގުތުކޮޅެއްކަމަށް.

🔴 އިސްރާއީލުގެ ވައިގެ ހަމަލާއެއްގައި އަލްޖަޒީރާގެ ޣައްޒާ ބިއުރޯގެ ވެރިޔާ، ވާއެލް ދަހުދޫހުގެ އަންހެނުންނާއި ދަރިންނާއި ތުއްތު ކާފަދަރިފުޅު މަރާލައިފި.

Advertisement

🔴 ޣައްޒާއަށް ދެމުންގެންދާ ހަމަލާތަކާ ގުޅިގެން އ.ދ. ގެ ސެކިއުރިޓީ ކައުންސިލަށް އެމެރިކާއާއި ރަޝީޔާ ހުށަހެޅި ޤަރާރު ވެސް ފާހެއް ނުވި. އެމެރިކާއިން ހުށަހެޅީ "ހިއުމެނިޓޭރިއަން ޕޯޒް" ނުވަތަ އިންސާނީ އެހީދިނުމަށް ހަރަކާތްތެރިވުމަށް ހަނގުރާމަ ވަގުތުކޮޅަކަށް މެދުކަނޑާލުމަށް. ރަޝިޔާއިން ހުށަހެޅި ޤަރާރުގައި އޮތީ "ހިއުމެނިޓޭރިއަން ސީޒްފަޔާ" ނުވަތަ ކަނޑައެޅޭ ވަކި މުއްދަތަކަށް މިލިޓަރީ އޮޕަރޭޝަންތައް ހުއްޓާލުމަށް. 

🔴 އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ތަކުރާރުކޮށް ބުނަމުންގެންދަނީ، އިސްރާއީލުން ޣައްޒާގެ ބިމަށް އަރައިގަތުމަށް ތައްޔާރުވަމުން އަންނަކަމަށް. މީގެ އިތުރުން ހިފާފައިވާ ހުޅަނގު އައްސޭރީގައި ކޮންމެ ދުވަހަކު އިސްރާއީލުން ހިންގާ އަސްކަރީ ރޭޑްތައް އިތުރުވާނެކަމަށް ބެލެވޭ.

🔴 އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ދެމުންގެންދާ ހަމަލާތަކުގައި މިހާތަނަށް ފަލަސްތީނުގެ 6،546 މީހުން މަރުވެފައިވޭ.