އޭއެފްސީ ކަޕްގެ ގްރޫޕް ސްޓޭޖްގެ 3 ވަނަ ބުރުގައި ދިވެހިރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް، އިންޑިއާގެ އޮޑިޝާ އެފްސީއިން އޭއެފްސީ ކަޕްގެ ފުރަތަމަ މޮޅު ހޯދައިފިއެވެ. ޑިލްހީ ޑައިނަމޯސް އެފްސީގެ ނަމުގައި 2014 ވަނަ އަހަރު އުފައްދާ، އަދި އޭގެ ފަހުން 2019 ގައި ކްލަބްގެ ނަން އޮޑިޝާ އެފްސީއަށް ބަދަލުކުރި މި ކްލަބު، މި ސީޒަންގެ އޭއެފްސީ ކަޕްގައި މި ވާދަކުރަނީ ކްލަބްގެ ތާރީހުގައި ވެސް މުޅިން އަލަށެވެ. އެމީހުންގެ ކަލިންގާ ސްޓޭޑިއަމްގައި ކުޅުނު މި މެޗުގައި މާޒިޔާގެ މައްޗަށް ކުރިހޯދާފައިވަނީ 6-1 އިންނެވެ.

މެޗު ފަށައިގެން މާގިނައިރުތަކެއް ނުވެ އޮޑިޝާއިން ލީޑު ނެގިއެވެ. މެޗުގެ 3 ވަނަ މިނެޓުގައި މި ގޯލު ކާމިޔާބުކޮށްދިނީ އެ ޓީމުގެ ޕުޓެއާއެވެ. އޭގެ 10 މިނެޓުފަހުން، މެޗުގެ 13 ވަނަ މިނެޓުގައި މާޒިޔާއިން މެޗުގެ ނަތީޖާ ހަމަހަމަ ކުރިއެވެ. މި ގޯލު ކާމިޔާބުކޮށްދިނީ އެ ޓީމުގެ ސާބިއާ ޑިފެންޑަރ ބްރަނިމީރް ޖޮސިޗްއެވެ. ނަމަވެސް މި ސްކޯ މާގިނައިރުތަކެއް ނުވެ އޮޑިޝާއިން ބަދަލު ކުރިއެވެ. އެގޮތުން މާޒިޔާގެ ގޯލަށްފަހު 6 މިނެޓުގެ ތެރޭގައި އޮޑިޝާއިން 2 ގޯލު ޖަހާ 3-1 ގެ ލީޑެއް ނެގިއެވެ. މި ގޯލުތައް ކާމިޔާބުކުރީ ކާލޯސް ޑެލްގާޑޯއާއި މޯޓަޑާ ފޯލްއެވެ.

މާޒިޔާގެ ޑިފެންޑަރުންނަށް ގިނަ ގޯސްތަކެއް ހެދުމުގެ ނަތީޖާއަކަށްވީ، އޮޑިޝާއިން ފަހު ހާފުގައި އިތުރު 3 ގޯލު ޖަހާ، 6-1 ގެ ނަތީޖާއަކުން މާޒިޔާ ބަލިކުރުމެވެ. ފަހު ހާފުގެ ގޯލުތައް އޮޑިޝާއަށް ކާމިޔާބުކޮށްދިނީ އަމޭ ރަނަވާޑޭ، އިސާކް ވަންލަލްރުއާޓްފެލާ އަދި ސާހިލް ޕާންވާރު އެވެ.

މި ނަތީޖާއާއެކު، މާޒިޔާ އާއި އޮޑިޝާއަށް 3 މެޗުން ޖުމްލަ 3 ޕޮއިންޓު ލިބިފައިވީނަމަވެސް، ގޯލު ތަފާތުން ގްރޫޕް ޑީ ގެ ތިން ވަނައިގައި އޮތީ އޮޑިޝާއެވެ.

މާޒިޔާއިން ހޯދި 3 ޕޮއިންޓް ހޯދާފައިވަނީ ރާއްޖޭގައި ބަޝުންދަރާ ކިންގްސް ބަލިކޮށްގެނެވެ. އެއަށްފަހު ރަށުން ބޭރުގައު ކުޅުނު 2 މެޗުން މި ވަނީ ބަލިވެފައެވެ. މާޒިޔާއިން ބަޝުންދަރާ ކިންގްސް ބަލިކޮށްފައިވަނީ 3-1 އިންނެވެ. އަދި އޭގެ ފަހުން މޯހަން ބަގާންއާ ކުޅުން މެޗުން ބަލިވީ 2-1 އިންނެވެ.

ނަތީޖާ މިހެން ނިކުތް ނަމަވެސް، މާލޭގައި ކުޅޭ މެޗުތައް މާޒިޔާ ކާމިޔާބުކޮށްފިނަމަ، ދެން އޮންނަ ބުރަށް ދަތުރުކުރުމަކީ އުނދަގޫ ކަމަކަށް ނުވާނެއެވެ.