މިއީ ހަމާސް އާއި އިޒްރޭލު ސިފައިންނާ ދެމެދު ކުރިޔަށްދާ ހަނގުރާމައިގެ 17 ވަނަ ދުވަސް، 23 އޮކްޓޯބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 ހަމާސްގެ ހަތިޔާރު އެޅި ވިންގުން ވަނީ ގަތަރާއި މިސްރު މެދުވެރިކޮށް ޣައްޒާގައި ބަންދުކޮށްފައި ތިބި އުމުރުން ދުވަސްވީ އިސްރާއީލުގެ 2 އަންހެނުން ދޫކޮށްލާފަ. އޭގެ ތެރޭގައި ހިމެނެނީ 79 އަހަރުގެ މީހަކާއި 84 އަހަރުގެ މީހެއް.

🔴 އިސްރާއީލުން މެދުނުކެނޑި ޣައްޒާއަށް ވައިގެ މަގުން ހަމަލާތައް ދެމުން ދާއިރު، ގިނަ އަދަދެއްގެ މީހުން ބޯހިޔާވަހިކަން ހޯދައިގެން ތިބި އަލް-ޝަޓި ރެފިއުޖީ ކޭމްޕަށް އިއްޔެ ވަނީ ހަމަލާދީފައި. ފަލަސްތީނުގެ ހެލްތް މިނިސްޓްރީއިން ހާމަކޮށްފައިވާ ގޮތުގައި، މި ހަމަލާތަކުގައި ގިނަ އަދަދެއްގެ ބަޔަކު މަރުވެފައިވާއިރު، އޭގެ ތެރޭގައި ގިނައީ އަންހެނުންނާ ކުޑަކުދިން.

Advertisement

🔴 އިސްރާއީލު ސިފައިން ރަހީނުކޮށް މެގިޑޯ ޖަލުގައި ބަންދުކޮށްފައިހުރި ހަމާސްގެ އިސް މެމްބަރެއް ކަމަށްވާ އުމަރު ދަރަޣްމޭ މަރާލާފައިވާކަމަށް ހަމާސް އިން ހާމަކޮށްފި. ނަމަވެސް އިސްރާއިޅުން ބުނީ އޭނާ މަރުވީ ބަލިވެގެން ކަމަށް.

🔴 އިރާގާއި ސީރިއާ އަދި އެހެނިހެން މެދުއިރުމަތީގެ ގައުމުތަކުގައި ހިނގަމުންދާ ސިލްސިލާ ހާދިސާތަކުގެ ތެރޭގައި، އެ ސަރަހައްދުގައި ހަރަކާތްތެރިވަމުންދާ އެމެރިކާ ސިފައިންނަށް ހަމަލާ ދިނުމަށް އީރާނުން މަގުފަހިކޮށްދޭކަމަށް ވައިޓް ހައުސްއިން ވަނީ ތުހުމަތުކޮށްފައި.

🔴 ރަފާހު ހުރަސްކޮށް ޣައްޒާއަށް މިހާތަނަށް 54 ޓްރަކްގެ އިންސާނީ އެހީ ފޯރުކޮށްދީފައިވީނަމަވެސް، އެއީ މިހާރު ޣައްޒާއަށް ބޭނުންޖެހިފައިވާ މިންވަރަށް ވުރެ މާ މަދު އަދަދެއްކަމަށް ކަމާގުޅޭ ފަރާތްތަކުން ހާމަކޮށްފައިވޭ.  އަދި މިހާތަނަށް އައިއިރުވެސް، ޣައްޒާއަށް މިވަގުތު އެންމެ ބޭނުންޖެހިފައިވާ ތެލުގެ އެހީ ފޯރުކޮށްދީފައެއް ނުވޭ.

🔴 އެމެރިކާގެ އޮފިޝަލަކު ދަ އެސޯސިއޭޓެޑް ޕްރެސް (އޭޕީ) ނޫސް އެޖެންސީއަށް ވިދާޅުވީ، އާބަން ހަނގުރާމައަށް ފަރިތަ މެރިން ކޯޕްސްގެ ޖެނެރަލަކު ހިމެނޭ ގޮތަށް އެމެރިކާގެ ހަނގުރާމަވެރި މާހިރުންތަކެއް އިސްރާއީލަށް ފޮނުވާފައިވޭ. އެ މީހުންގެ ބޭނުމަކީ އިސްރާއިލް ސިފައިންނަށް ހަނގުރާމައިގެ ފަންނީ އިރުޝާދު ދިނުން.

🔴 ޣައްޒާގައި ހަރަކާތްތެރިވަމުންދާ އ.ދ. ގެ އޮފިޝަލުންގެ ތެރެއިން 35 އޮފިޝަލަކު މިހާތަނަށް އިސްރާއީލުން ދިން ހަމަލާތަކުގައި މަރުވެފައިވާކަމަށް އެ އެޖެންސީ ހާމަކޮށްފައިވޭ.

🔴 މިހާތަނަށް ފަލަސްތީނުގެ ޖުމްލަ 5،087 މީހަކު މަރާލާފައިވޭ. އަދި އިސްރާއީލުގެ ލާއިންސާނީ ހަމަލާތަކުގައި 14،000 އަށް ވުރެ ގިނަ މީހުންނަށް ވަނީ އެކިވަރުގެ އަނިޔާތައް ލިބިފައި. ހަމާސްގެ ހަމަލާތަކުގައި އިސްރާއީލުން މިހާތަނަށް ގާތްގަނޑަކަށް 1،400 މީހުން މަރުވެފައިވާކަމަށް ވޭ.