މިއަންނަ އަހަރު ސައުދީ އަރަބިއްޔާގައި ބޭއްވުމަށް ތައްޔާރުވަމުންދާ ދުނިޔޭގެ ފުރަތަމަ އީސްޕޯޓްސް ވޯލްޑް ކަޕް ލޯންޗު ކުރުމުގެ ހަފްލާގައި ސައުދީ ލީގުގެ އަލް ނަސްރް އަށް ކުޅެމުންދާ ކްރިސްޓިއާނޯ ރޮނާލްޑޯ އާއި ސައުދީ ޕްރިންސް މުޙައްމަދު ބިން ސަލްމާން ބައިވެރިވެއްޖެއެވެ. ރޮނާލްޑޯ މި ހަފްލާގައި ބައިވެރިވީ ޙާއްސަ މެހެމާނެއްގެ ގޮތުގައެވެ.

މި އިވެންޓާ ގުޅިގެން ރޮނާލްޑޯ ސޯޝަލް މީޑިއާގައި ހާމަކޮށްފައިވާގޮތުން، ސައުދީ ޕްރިންސާއި ބައްދަލުވުމަކީ އޭނާއަށް ލިބުނު ވަރަށް ބޮޑު ޝަރަފެކެވެ. އަދި އީސްޕޯޓްސްއާ ގުޅޭގޮތުން ބޭއްވި ޕެނަލް ޑިސްކަޝަންގައި ބައިވެރިވުމުގެ ފުރުސަތު ލިބުމަކީ އޭނާ ވަރަށް އުފާކުރާ ކަމެއްގެ ގޮތުގައި ސިފަކޮށްފައިވެއެވެ.

ސައުދީ އަރަބިޔާއިން ހޯމަ ދުވަހު ހާމަކޮށްފައިވާގޮތުން، އީ ސްޕޯޓްސް ވޯލްޑް ކަޕް ކޮންމެ އަހަރަކު ބާއްވާނެއެވެ، އަދި ދުނިޔޭގެ މަޝްހޫރު ހުރިހާ ކުޅިވަރެއް މި އިވެންޓުގައި ހިމެނޭނެއެވެ. މީގެއިތުރުން މި މުބާރާތްތަކުގެ ފައިސާގެ އިނާމު ވެގެން ދާނީ މިހާތަނަށް އީސްޕޯޓްސް އިވެންޓެއްގައި ދެވޭ އެންމެ ބޮޑު "ޕްރައިޒް ޕޫލް" އަށެވެ.

ސައުދީގެ އިޤްތިޞާދު ހަމައެކަނި ތެލަށް ބަރޯސާނުވެ، އެކި ގޮތްގޮތުން ފުޅާ ކުރުމުގެ މަގްސަދުގައި "ވިޝަން 2030" ގެ ނަމުގައި ކުރިޔަށްގެންދާ ސައުދީގެ "ޓްރާންފޯމޭޝަން ޕްލޭން" ހާސިލް ކުރުމަށްޓަކައި އެ ގައުމުގެ ޕްރިންސް މުޙައްމަދު އަންނަނީ ސްޕޯޓްސް، އީސްޕޯޓްސް އަދި ގޭމިންގ ގެ ދާއިރާއިން ގިނަ މަސައްކަތްތަކެއް ކުރަމުންނެވެ. 

ލޯންޗިންގ އިވެންޓުގައި ސައުދީ ޕްރިންސް (ކ) އަދި ފީފާގެ ރައީސް އިންފެންޓީނޯ (މެދަށް)، ފޮޓޯ: ސައުދީ ގެޒެޓް