ސްޓެލްކޯއިން "އަހަރުމެން ފަލަސްތީނާއެކު ފަންޑަށް" 500،000.00 (ފަސްލައްކަ ރުފިޔާ) ހަދިޔާ ކޮށްފިއެވެ. މިއީ އެ ކުންފުނީގެ ސީއެސްއާރުގެ ދަށުން ކުރިޔަށް ގެންދިޔަ ހަރަކާތެކެވެ. 

މި ފައިސާ އިންޓަރނޭޝަނަލް އެއިޑް ކެމްޕެއިނާއި ހަވާލުކޮށްފައިވަނީ މިއަދު ސްޓެލްކޯ ބޯޑު ރޯމްގައި ބޭއްވި ހާއްސަ ރަސްމިއްޔާތެއްގައި ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފެވެ. އަދި އިންޓަރނޭޝަނަލް އެއިޑް ކެމްޕެއިންގެ ފަރާތުން ޗެކާ ހަވާލުވެލެއްވީ އިންޓަރނޭޝަނަލް އެއިޑް ކެމްޕެއިންގެ ޗެއާމަން އަހުމަދު އިގްބާލެވެ. 

އަދި މީގެ އިތުރުން ފަލަސްތީނުގެ ރައްޔިތުންނަށް އެހީވުމަށް އިންޓަރނޭޝަނަލް އެއިޑް ކެމްޕެއިންއިންގެ ފަރާތުން ކުރިއަށް ގެންދާ ފަންޑު ހޯދުމުގެ ހަރަކާތްތަކަށް އެހީތެރިވެދިނުމުގެ ގޮތުން، ސްޓެލްކޯގެ ހެޑް އޮފީހުގެ ލޮބީ ސަރަހައްދުގައިވެސް ފަންޑުފޮއްޓެއް ބެހެއްޓިފައިވާކަމަށް ސްޓެލްކޯއިން މައުލޫމާތުދެއެވެ.

ޗެކް ހަވާލުކުރުމަށްފަހު ސްޓެލްކޯގެ މުވައްޒަފުންނާއި އައިއޭސީގެ ބޭފުޅުން ފޮޓޯއަކަށް ހުއްޓިގެން

އިސްރާއީލަށް 7 އޮކްޓޯބަރ 2023 ވަނަ ދުވަހު ހަމާސް އިން ދިން ހަމަލާތަކާ ގުޅިގެން، ފަލަސްތީނުގެ ކުޑަކުދިންނާއި އަންހެނުން ހިމެނޭހެން ޣައްޒާއަށް ވަރުގަދަ ހަމަލާތައްދީ، އެ ގައުމުގެ މައުސޫމް އެތައް ބަޔަކު އިސްރާއީލުން އަންނަނީ ނެތިކޮށްލަމުންނެވެ. މީގެ އިތުރުން ފަލަސްތީނުގެ އެއް މިލިއަނަށް ވުރެ ގިނަ މީހުން އެމީހުންގެ ގެދޮރުން ނިކުތުމަށް އަންގާ، އަދި އިމާރާތްތަކަށް ހަމަލާދީ މުޅި ޣައްޒާގެ ބޮޑު ބައެއް ބިމާހަމަކުރަމުން ދާއިރު، އެ ގައުމުގެ ގިނަ ބަޔަކު ވަނީ މަގުމަތިވެ ހާލުގައިޖެހި، ގިނަ ގުނަ އެހީތަކަށް ބޭނުންވެފައެވެ.