މިއަހަރުގެ ދިރާގު ރޯޑްރޭހުގެ ބައިވެރިން ދުވުމަށް ހަމަޖައްސާފައިވާ މަގުތަކުގައި، ޕާކުކޮށްފައި ހުރި އުޅަނދުތައް ނަގަށް އާބަންކޯއިން އަންގައިފިއެވެ.

އާބަންކޯއިން ބުނީ، 2023 އޮކްޓޫބަރު 27ވާ ހުކުރު ދުވަހުގައި އޮންނަ، ދިރާގު ރޯޑު ރޭހުގެ ބައިވެރިން ދުވުމަށް ހަމަޖައްސާފައިވާ މަގުތަކުގައި ހުރި އުޅަނދުތައް ހުކުރު ދުވަހުގެ ކުރިން ނެގުމަށް އަންގާ ކަމަށެވެ.

ދިރާގު ރޯޑުރޭސް ފަށާނީ ހުޅުމާލެ ސެންޓްރަލް ޕާކުންނެވެ. މިގޮތުން އުޅަނދުތައް ނެގުމަށް އަންގާފައި ވަނި ހުޅުމާލެ ރީތިގަސްމަގާއި، ރަބަރުގަސް މަގާއި، މިދިލިމަގާއި، ފިތުރޯނު މަގާއި އޯކިޑުމާ ހިނގުމާއި، ކުރެދިމާ ހިނގުމުގައި ޕާކުކޮށްފައިވާ އެއްގަމު އުޅަނދު ފަހަރެވެ.

ދިރާގު ރޯޑް ރޭހަކީ ރާއްޖޭގައި ބާއްވާ އެންމެ ބޮޑު ދުވުމެވެ. މިފަހަރުގެ ދިރާގު ރޯޑު ރޭހުގައި 4000 ވުރެ ގިނަ މީހުން ބައިވެރިވެފައިވާ ކަމުގައި ދިރާގުން ވަނީ ބުނެފައެވެ. މިއަހަރުގެ ދުވުންވެސް ދިރާގުން ޚާއްޞަކޮށްފައި ވަނީ ކުޑަކުދިންނަށެވެ.