ރާއްޖޭގެ އެންމެ އާބާދީ މަދުރަށްތަކުގެ ތެރޭގައި ހިމެނޭ ވ. ރަކީދޫގައި ސަރުކާރުން ޢިމާރާތްކުރި ސެޓަލައިޓް ސްކޫލުގައި މިއަދު ކިޔަވައިދޭން ފަށައިފިއެވެ.

2008 ވަނަ އަހަރު ރަކީދޫ ސްކޫލު ބަންދުކުރީ، އެސްކޫލުގައި އެކަށީގެންވާ ކިޔަވާނެ ދަރިވަރުން ނެތުމުންނެވެ. 15 އަހަރު ފަހުން މިއަދު އަލުން ރަކީދޫ ސްކޫލު ހުޅުވީ 3 ކުދިންނާއި އެކު ސެޓަލައިޓް ސްކޫލެއްގެ ގޮތުގައެވެ.

މިނިސްޓްރީ އޮފް އެޑިޔުކޭޝަނުން އެންމެ ފުރަތަމަ މަސައްކަތް ކުރީ، މިއަހަރުގެ ދިރާސީ އަހަރު ފެށޭއިރު އެސްކޫލުގައި ކިޔަވައިދޭން ފެށުމަށެވެ. މިއަދު ކިޔަވައިދޭން ފެށި އިރު، މިއަދަކީ، ދިރާސީ އަހަރުގެ ފުރަތަމަ ޓާމުގެ މިޑްޓަރމް ބްރޭކަށް ސްކޫލުތައް ބަންދުވެފައި ހުޅުވުނު ފުރަތަމަ ދުވަހެވެ.

އާބާދީ މަދުވުމުގެ ސަބަބުން ރާއްޖޭގެ ހަރަށެއްގައި މިހާރު ވަނީ ސެޓަލައިޓް ނިޒާމަށް ކިޔަވައިދޭން ފަށާފައެވެ. އެއީ ބ. ފެހެންދޫ، ބ. ފުޅަދޫ، ގއ. ކޮނޑޭ، އދ. ދިއްދޫ، ވ. ތިނަދޫ އަދި ވ. ރަކީދޫ ސްކޫލެވެ.