މި މަސް ނިމުމުގެ ކުރިން ރާއްޖެއަށް 1.5 މިލިއަން ފަތުރުވެރިން އަންނާނެ ކަމަށް ޓޫރިޒަމް މިނިސްޓްރީން އަންދާޒާކޮށްފިއެވެ.

އިއްޔެގެ ނިޔަލަށް ރާއްޖެއަށް 1،464،340 ފަތުރުވެރިން ވަނީ އައިސްފައެވެ. މިއީ މިދިޔަ އަހަރާއި އަޅާބަލާއިރު %13.6 އިތުރު އަދަދެކެވެ.

ޓޫރިޒަމް މިނިސްޓްރީން ބުނީ މިހާރު ދުވާލަކު އެވަރެޖުކޮށް 4،900 އަށްވުރެ ގިނަ ޓޫރިސްޓުން އަންނަކަމަށެވެ. އެހެންކަމުން 1.5 މިލިއަން ހަމަކުރުމުމަށް އިތުރަށް ބޭނުން ވަނީ 35،660 ޓޫރިސްޓުންނެވެ. މިނިސްޓްރީން ވަނީ މި މަސް ނިމުމުގެ ކުރިން މި އަދަދު ހަމަވާނެކަމަށް އަންދާޒާކޮށްފައެވެ.

Advertisement

މިދިޔަ އަހަރުގެ އޮކްޓޯބަރު މަހު 153،737 ޓޫރިސްޓުން ރާއްޖެ އައިސްފައިވާއިރު، މި މަހުގެ މިހާތަނަށް 103،292 ޓޫރިސްޓުން ވަނީ ރާއްޖެ އައިސްފައެވެ. ޓޫރިޒަމް މިނިސްޓްރީން އަންދާޒާ ކުރަނީ މި އަހަރުގެ ނިޔަލަށް ރާއްޖެ އަށް 1.8 މިލިއަން ޓޫރިސްޓުން އަންނާނެ ކަމަށެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. އެއީ 167،594 ފަތުރުވެރިންނެވެ. 2 ވަނައަށް އެންމެ ގިނަ ފަތުރުވެރިން އައިސްފައިވަނީ ޗައިނާއިންނެވެ. އެއީ 159،938 ފަތުރުވެރިންނެވެ.

ޓޫރިސްޓުންނަށް ހިދުމަތް ދިނުމަށް ރަޖިސްޓްރީ ކޮށްފައިވާ 1،267 ތަނެއްގައި 62،870 އެނދު ހިންގަމުން ގެންދެ އެވެ. އޭގެ ތެރެއިން 68 ޕަސެންޓަކީ ރިސޯޓް ތަކުގައި ރަޖިސްޓްރީ ކޮށްފައިވާ އެނދެވެ.