މިމަހުގެ މިހާތަނަށް 8 މިލިއަނަށް ވުރެ ގިނަ ރުފިޔާގެ މަސްތުވާތަކެތި ހިފަހައްޓާފައިވާ ކަމަށް ކަސްޓަސްއިން ބުނެފިއެވެ.

މި ތަކެތި ހިފަހައްޓާފައި ވަނީ، ކުރިއަރު އަދި އެއާ ކާގޯ މެދުވެރިކޮށް ރާއްޖެ އެތެރެކުރަން އުޅެނިކޮށް، ތިން ޝިޕްމެންޓެއްގެ ތެރެއިންނެވެ. މިތަކެތީގެ ޖުމްލަ ބަރުދަނަކީ 8.8 ކިލޯ ކަމަށް ކަސްޓަމްސްއިން ވަނީ ބުނެފައެވެ.

ކަސްޓަމްސްއިން ބުނީ ފުރަތަމަ ޝިޕްމަންޓް އަތުލައިގަތީ މިދިޔަ މަހުގެ 27ގައިކަމަށެވެ. ޖަރުމަނުން ރާއްޖެ ގެނައި އެ ޕެކޭޖުން 2،250 ގްރާމް މެފްޑްރޯން ހުރިކަމަށް ވަނީ ބުނެފައެވެ.

ފޮޓޯ: ކަސްޓަމްސް

ދެ ވަނަ ޝިޕްމެންޓް އަތުލައިގަތީ މި މަހުގެ 5 ވަނަ ދުވަހުއެވެ. އިންޑިއާ އިން އެތެރެކުރި އެ ތަކެތިން 3،040 ގްރާމް ހެރޮއިން ފެނިފައިވާއިރު، ތިން ވަނަ ޝިޕްމަންޓް އަތުލައިގަތީ މި މަހުގެ 7 ވަނަ ދުވަހުއެވެ. ތައިލެންޑް މަގުން އެއާ ކާގޯ އިން ގެނައި އެ ތަކެތީގެ ތެރެއިން 3،550 ގްރާމް ހެރޮއިން ވަނީ ފެނިފައެވެ.

އަތުލައިގަތް މަސްތުވާތަކެތި މިހާރު ފުލުހުންނާ ހަވާލުކޮށްފައިވާ ކަމަށް ކަސްޓަމްސް އިން ވަނީ ބުނެފައެވެ.