މިއީ ހަމާސް އާއި އިޒްރޭލު ސިފައިންނާ ދެމެދު ކުރިޔަށްދާ ހަނގުރާމައިގެ 15 ވަނަ ދުވަސް،21 އޮކްޓޯބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 އިސްރާއީލުގެ އަސްކަރިއްޔާއިން ޣައްޒާގެ ބިމަށް އަރައިގަތުމަށް ތައްޔާރުވުމުގެ އިތުރު މަރުހަލާތައް ކުރިޔަށްދާއިރު، އިސްރާއީލުގެ އަސްކަރިއްޔާއިން ބުނަމުން ގެންދަނީ ރޮކެޓު ހަމަލާތައް ދިނުން ހުއްޓުމެއް ނެތި ކުރިޔަށް ގެންދާނެކަމަށް. 

🔴 ޣައްޒާގެ ރައްޔިތުންނަށް ބޭނުންވާ ޒަރޫރީ ބައެއްތަކެތި މިސްރު މަގުން ޣައްޒާއަށް ވަނުމުގެ ހުއްދަ ދީފައިވީ ނަމަވެސް، ދިގު މުއްދަތަކަށް މިކަން ކުރިޔަށްދާނެކަމުގެ އެއްބަސްވުމެއް ނެތުމުން، ކަމާބެހޭ ފަރާތްތަކުން މި އެހީ ސިފަކުރަނީ، އެއީ 'ކަނޑުގެ ލޮނު ގަނޑުން ތިއްކެއް' ގެ މިންވަރުގެ ގޮތުގައި. 

🔴 ޣައްޒާ ވަށާލާފައި ތިބި އިސްރާއީލު ސިފައިން އެ ރަށަށް ތެޔޮ އެތެރެކުރުން ހުއްޓުވުމާ ގުޅިގެން އ.ދ. އިން ކަނބޮޑުވުން ފާޅުކޮށްފައިވޭ. އަދި ޣައްޒާގެ ހޮސްޕިޓަލްތަކުގައި ހުރި ތެލުގެ ސަޕްލައި ހަލުވިކަމާއެކު ހުސްވަމުންދާތީ، ވިހެއުމަށްފަހު އެކި ފަރުވާތައް ދެމުންގެންދާ 130 ތުއްތު ކުދިންގެ ފުރާނަ ގެއްލިދާނެކަމުގެ އިންޒާރު މެޑިކަލް އެއިޑް ފޯ ފަލަސްތީނުން (އެމްއޭޕީ) އިން ދީފައިވޭ.

🔴 އިސްރާއީލުގެ އަސްކަރިއްޔާއިން ޣައްޒާގެ އުތުރުގައި ދިރިއުޅޭ އާންމުންނަށް ދިން އިންޒާރެއްގައި ބުނެފައިވަނީ، އެމީހުން ޣައްޒާއިން ނުނިކުމެއްޖެނަމަ އެމީހުންނަކީ ޓެރަރިޒަމަށް ވާގިވެރިވާ ބައެއްގެ ގޮތުގައި ދެކޭނެ ކަމަށް. ނަމަވެސް އިސްރާއީލުން ފަހުން ބުނީ، އެ އިންޒާރު އެހާ ހަރުކަށިކަމަށް އެ ސިފަކުރެވުނީ ޢަރަބި ބަހަށް ތަރުޖަމާ ކުރިގޮތުންކަމަށް.

🔴 އިސްރާއީލާއި ލުބުނާނުގެ ބޯޑަރުގައި ހަމަލާތައް ބަދަލުކުރަމުންދާއިރު، އިއްޔެ އެކަނިވެސް ހިޒްބުالله ގެ 6 ހަނގުރާމަވެރިން މަރުވެފައިވޭ. 

🔴 އިސްރާއިލު-ހަމާސް ހަނގުރާމަ ނިމުމަކަށް ގެނެވޭނެ ގޮތްތަކާ ގުޅޭ ގޮތުން މަޝްވަރާކުރުމަށް ދުނިޔޭގެ ލީޑަރުން ބައިވެރިވާ ސަމިޓެއް މިސްރުގެ ޤާހިރާގައި. ސަމިޓް ފޯ ޕީސްގެ ނަމުން ނަންދެވިފައިވާ މި ބައްދަލުވުމުގައި ޖޯޑަން، ފްރާންސް، ޖަރުމަން، ރަޝިޔާ، ޗައިނާ، އިނގިރޭސިވިލާތް، އެމެރިކާ، ގަތަރު އަދި ދެކުނު އެފްރިކާ ފަދަ ގައުމުތަކުގެ މަންދޫބުން ބައިވެރިވެފައިވޭ.

🔴 އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މަރުވި މީހުންގެ އަދަދު މިހާރު 4،385 އަށް އަރާފައިވޭ.