މި އަހަރު ޔާރާ ޕްރޮޑަކްޝަންސް އިން ބައިސްކޯފް މެދުވެރިކޮށް ގެނެސްދޭންފަށާފައިވާ 'ޔާރާ' ގިނަބައެއްގެ ލޮލުގައި އަޅައިގަތީ މި ޕްރޮޑަކްޝަން ހައުސް އާއްމުންގެ މެދުގައި އެންމެ މަޝްހޫރުވެފައިވާ ނަން ބޭނުންކޮށްގެން ސީރީޒް އެއް ހަދާތީއެވެ. ދެން އަނެއްކާވެސް ފެނުނީ ރިޝްމީ އާއި އައްޒަ ދެބެންގެ ރޯލް ކުޅެ، އެމީހުންގެ މަންމަ އައިމިނަތު ރަޝީދާ ހަމަ މަންމަގެ ރޯލުން ފެނިގެންދާތަނެވެ. މިފަދަ އެތައް ކަމަކާ ގުޅިގެން ޔާރާ ސީރީޒް އޮތީ ވަރަށް ހާއްސަވެފައެވެ.

އެޕްރީލް މަހު ސްޓްރީމްކުރަން ފެށި މި ސީރީސްގެ ފުރަތަމަ ދެ އެޕިސޯޑު އޮލިމްޕަހުގައި ޕްރެމިއަރ ކުރިއެވެ. އަދި ފުރަތަމަ އެޕިސޯޑުގައި ވެސް ވަނީ ވަރަށް ހާއްސަ ލަވަ ސެޓެއް ހިމެނިފައެވެ. 2000 ވަނަ އަހަރުގެ ކުރީކޮޅުގައި މަޝްހޫރުވި ޔާރާ ލަވަ ސީޑީތަކުގައި ހިމެނޭ ލަވަތައް މިލަވަ ސެޓުން ފެނިގެންދިއައެވެ.

ސީޒަން 01 ގެ ބާރަ އެޕިސޯޑު ނިންމާލުމަށްފަހު، މިސީރީޒްގެ 02 ވަނަ ސީޒަންގެ އެޕިސޯޑުތައް ސްޓްރީމްކުރަން ފަށާފައިވަނީ އޮކްޓޫބަރު 05 ވަނަ ދުވަހުއެވެ. އެގޮތުން ކޮންމެ ބުރާސްފަތި ދުވަހެއްގެ ރޭ 9 ޖަހާއިރު އައު އެޕިސޯޑެއް އަނެއްކާވެސް ބެލުންތެރިންނަށް ބަލާލަން ލިބޭނެއެވެ.

Advertisement

04 ސީޒަނަކަށް ބަހާލައިގެން ނެރޭ މިސީރީޒް ޑައިރެކްޓު ކުރަނީ އައިޝަތު ރިޝްމީއެވެ. އަދި ލިޔުނީ އަހުމަދު އިޤްބާލްއެވެ. ޔާރާގެ އެޕިސޯޑުތަކުން ގާތްގަނޑަކަށް 90 އަށްވުރެ ގިނަ މަޝްހޫރު ފަންނާނުން ފެނިގެންދާނެއެވެ. މިއީ އާއިލީ މައްސަލަތަކާއި ދެމަފިރިންނާއި ލޯބިވެރިން އަދި ރައްޓެހިންގެ މެދުގައި ހިނގާ ކަންތައްތަކެއް ދައްކުވައިދޭ ސީރީޒްއެކެވެ. ސީރީޒްގެ ކޮސްޓިއުމާއި ސެޓްތަކަށް ވަރަށް މަސައްކަތް ކޮށްފައިވާއިރު މި ސީރީޒް އަކީ މިހާރު ބައިސްކޯފުގައި އެންމެ ހިނގަމުންދާ ޝޯވއެވެ.