ޔަޝް ރާޖް ފިލްމްސްގެ އެންމެ ކާމިޔާބު އެއް ފްރެންޗައިޒް ކަމުގައިވާ ސަލްމާން ޚާންގެ 'ޓައިގަރ' ފްރެންޗައިޒްގެ 3 ވަނަ ފިލްމު 'ޓައިގަރ 3' ގެ ޓްރެއިލަރ ދައްކާލައިފިއެވެ. މީގެ ކުރިން މި ފިލްމް ސީރީޒްގެ ނުކުމެފައި ވަނީ 'އޭކް ތަ ޓައިގަރ (2012)' އަދި 'ޓައިގަރ ޒިންދާ ހޭ (2017)' އެވެ. ތިންވަނަ ފިލްމެއްގެ ގޮތުގައި 'ޓައިގަރ 3' އަންނައިރު މިފިލްމުން ވެސް ފެނިގެންދާނީ ސަލްމާން ޚާން އަދި ކެޓްރީނާ ކައިފް އެވެ. ނަމަވެސް، މިފިލްމުގެ ވިލަންގެ ރޯލުން މިފަހަރު އިމްރާން ހަޝްމީ ފެނިގެންދާނެވެ. މިއީ ސަލްމާން އަދި ކެޓްރީނާއާއެކު ވެސް އިމްރާން ސްކްރީން ޝެއަރކުރާ ފުރަތަމަ ފަހަރެވެ.

'ޓައިގަރ 3' އަށް ގިނަބަޔަކު މަޑުކުރަމުންދާއިރު، އެންމެންގެ ސުވާލަކީ ސަލްމާން ޚާންއަށް މިއަހަރު ޝާހްރުކްގެ ރެކޯޑުތައް މުގުރާލެވިދާނެތޯ ކުރެވޭ ސުވާލެވެ. ޝާހްރުކް ޚާންގެ 'ޕަޓާން' އަދި 'ޖަވާން' ވެސް 500 ކްރޯރ އަށްވުރެ ގިނަ ފައިސާ އިންޑިއާއިން ހޯދާފައިވާއިރު، ސަނީ ޑިއޯލްގެ 'ގަދަރު 2' ވެސް ވަނީ 500 ކްރޯރ މިއަހަރު ހޯދާފައެވެ. މިއީ މުޅިން ވެސް ބޮލީވުޑަށް އައު ރެކޯޑުތަކެކެވެ. އެހެންކަމުން، މިހާރު އެންމެން ވެސް ކެތްތެރިކަމާއެކު ބަލަމުން އެދަނީ ސަލްމާން ޚާންގެ ފިލްމަށް އޮތް ސަޕޯޓަށެވެ.

ޔަޝް ރާޖް ފިލްމްސް އިން ވަނީ އެމީހުންގެ ސްޕައި ތްރިލާތައް އެއްކޮށްލުމަށް ރާވައި، ސްޕައި ޔުނިވަރސްއެއް ޕަތާންއާއެކު ފަށާފައެވެ. އެގޮތުން، ޕަތާންގައި ސަލްމާން ޚާން 'ޓައިގަރ' ގެ ގޮތުގައި ހާއްސަ ފެނިލުމަކުން ފެނިގެންދިޔައިރު، 'ޓައިގަރ 3' ގައި ޝާހްރުކް ޚާން ވެސް ޕަޓާންގެ ގޮތުގައި ފެނިގެންދާނެ ކަމަށްވެއެވެ. މިއީވެސް، މިދެ އެކްޓަރުންގެ ފޭނުން މިފިލްމަށް އިންތިޒާރުކުރާ އެއް ސަބަބެވެ. މި ސްޕައި ޔުނިވަރސްގައި ދެން ހިމެނޭ ފިލްމަކީ ރިތިކް ރޯޝަންގެ 'ވަރ' އެވެ.

Advertisement

'ޓައިގަރ 3' ރިލީސްކުރުމަށް ހަމަޖެހިފައިވަނީ 12 ނޮވެމްބަރުގައި ދިވާލީ ތެރޭގައެވެ. އެހެންކަމުން، އަހަރެމެން ޖެހޭނީ މި ފިލްމުން މުގުރާ ރެކޯޑުތައް ބަލާލަން އަދި ކުޑަކޮށް އިންތިޒާރުކޮށްލާށެވެ.