ކަރަންޓާއި ފެނާއި އިންޓަރނެޓް ކަނޑާލައި، ކާބޯތަކެއްޗާއި ބޭހާއި ތެޔޮ ވެއްދުން މަނާކޮށް، އިޒްރޭލުން ޣައްޒާއަށް ބޮންއަޅައި ޣައްޒާ ޙިސާރުކޮށްފައިވާތާ 14 ދުވަސްފަހުން، މިސްރާއި ރަފަހް ގުޅޭ ބޯޑަރު ހުޅުވައި، އެހީގެ ތަކެއްޗާއި އެކު ފުރަތަމަ ޓްރަކްތައް ޣައްޒާއަށް ވަދެއްޖެއެވެ.

އެހީގެ ތަކެއްޗާއިއެކު ޣައްޒާއަށް ވަނުމުގެ ފުރުޞަތު ފުރަތަމަ ދީފައި ވަނީ 20 ޓްރަކަށެވެ. އޭގެ ތެރޭގައި ހިމެނެނީ ޣައްޒާގެ އާއްމުންނަށް ބޭނުންވާ އެންމެ އަސާސި ތަކެއްޗެވެ. ޣައްޒާ އާ މިސްރުގެ ރަފަހް ގުޅޭ ރަފަހް ކްރޮސިންގ މިއަދު ހުޅުވައި، އެހީގެތަކެތި ޣައްޒާއަށް ވައްދަން ފަށާފައި މިވަނީ، އިޒްރޭލުން ދެމުންދާ ވައިގެ ހަމަލާތަކާއި، ހިޞާރުގެ ސަބަބުން ޣައްޒާގެ 2.1 މިލިއަން ރައްޔިތުންނަށް އިންސާނީ ބޮޑު ކާރިސާއެއް ކުރިމަތިވެފައި ވަނިކޮށެވެ.

20 ޓްރަކްގެ ތަކެތި ޣައްޒާއަށް ވެއްދުމުގެ ހުއްދަދީފައި ވާއިރު، އެއީ ޣައްޒާއަށް ބޭނުންވާ އެހީގެ ވަރަށް މަދު މިންވަރެކެވެ. މިހާރުވެސް ޣައްޒާއަށް ބޭނުންވާ އިންސާނީ އެހީގެ ތަކެއްޗާއިއެކު، ރަފަހް ބޯޑަރުގައި 200 ވުރެ ގިނަ ޓްރަކް އެބައޮތެވެ.

އިޒްރޭލުން ޣައްޒާއިން ކަރަންޓާއި ފެން ކަނޑާލުމުގެ ސަބަބުން، ޣައްޒާއަށް ސާފު ބޯފެން ނުލިބޭތާވެސް ވަނީ 2 ހަފްތާވެފައެވެ. އަދި ކާބޯތަކެތި ތައްޔާރުކުރާ ތަންތަނަށްވެސް އިޒްރާއީލުން ވަނީ ވައިގެ ހަމަލާތައްދީ ބިމާ ހަމަކޮށްލާފައި ވާއިރު، ޣައްޒާގެ ރައްޔިތުން މިހާރު ދިރިއުޅެނީ ދުވާލަކު އެންމެ އިރަކު ކައިގެންނެވެ.

ޣައްޒާއަށް އިންސާނީ އެހީގެ ތަކެތި ވެއްދުންވެސް އިޒްރޭލުން މަނާކޮށްފައި ވާއިރު، ދެފަހަރެއްގެ މަތިން ރަފަހް ބޯޑަރުގައި ޤާއިމްކޮށްފައިވާ ރަފަހް ކްރޮސިންގއަށްވެސް އިޒްރޭލުގެ ހައްދުފަހަނަ އެޅި ސިފައިން ވަނީ ހަމަލާތައް ދީފައެވެ.

މިހާތަނަށް 4100 ވުރެ ގިނަ މީހުން އިޒްރޭލުން ދެމުންދާ ވައިގެ ހަމަލާތަކުގައި ވަނީ ޝަހީދު ވެފައެވެ.