އިޒްރާއީލުން ހިފާފައިވާ ބިންތަކުގައި އާބާދުކޮށްފައިވާ އިޒްރޭލުގެ ރައްޔިތުންގެ ތެރެއިން ހަމާސްއިން އަސީރުންގެ ގޮތުގައި ހައްޔަރުކޮށްގެން ޣައްޒާއަށް ގެންދިޔަ މީހުންގެ ތެރޭގައި ހިމެނޭ އެމެރިކާގެ ދެ ރައްޔިތަކު މިނިވަންކޮށްފިއެވެ.

14 ދުވަސް ފަހުން، ހަމާސްއިން ދޫކޮށްލި 2 އަސީރުންނަކީ، ޖުޑިތު ރާނަން، 59 އާއި އޭނާގެ 17 އަހަރުގެ އަންހެން ދަރިފުޅު ނަތާލީ ރާނަން އެވެ.

އެދެމީހުން މިނިވަންކޮށްފައި ވަނީ ރޭގައެވެ.

ހަމާސްއިން އަސީރުންގެ ގޮތުގައި ޣައްޒާއަށް ގެންދިޔަ މީހުންގެ އަދަދު 200އަށް އަރާނެ ކަމުގައި އިޒްރާއީލުން ވަނީ ބުނެފައެވެ. ހަމާސްއިން އޮކްޓޫބަރު 7 ވަނަ ދުވަހު އިޒްރޭލަށް ދިން ހަމަލާތަކުގެ ބަދަލު ހިފުމުގެ ގޮތުން އިޒްރޭލުން ދަނީ ފަލަސްޠީނުގެ ޣައްޒާގެ އާއްމުންނަށް ހަމަލާދީ އަންހެނުންނާއި ކުޑަކުދީން ޝަހީދު ކުރަމުންނެވެ. އަދި ޣައްޒާއިން ފެނާއި ކަރަންޓާއި އިންޓަރނެޓް ކަނޑާލައި ޣައްޒާއަށް ކާބޯތަކެއްޗާއި ތެލާއި ބޭސް ވެއްދޭނެ މަގުތައްވެސް އިޒްރޭލުން ވަނީ ބަންދުކޮށްފައެވެ.

އިޒްރޭލުން ޣައްޒާގެ އާއްމު ރައްޔިތުންނާއި ދެކޮޅަށް ފާޅުގައި ހަނގުރާމައިގެ ޖަރީމާތައް ހިންގަމުންދާއިރު، އެކަމަށް ވާގިވެރިވަމުން އަންނަނީ އެމެރިކާއިންނާއި އިނގިރޭސި ވިލާތުންނެވެ. އިޒްރޭލަކީ، އިނގިރޭސި ވިލާތާއި، އެމެރިކާގެ މަދަދާއި އެހީއާއެކު ޒަޔަނިސްޓުން ފަލަސްޠީނުގެ ބިމުގައި ޤާއިމްކުރި ޣައިރު ޤާނޫނީ ދައުލަތެކެވެ.