ފަލަސްޠީނުގެ ރައްޔިތުންނަށް އެހީވުމަށް މަމްސް ޖަމުޢިއްޔާއިން އިސްނަގައިގެން ޙާއްސަ ހަރަކާތެއް ބޭއްވުމަށް ނިންމައިފިއެވެ. މި ހަރަކާތް އޮންނާނީ މިއަދު ހުޅުމާލެ ރުއްގަނޑު 1 ގައެވެ. މި އިވެންޓުގެ ހޮސްޓިން ޕާޓުނަރަކީ އާބަންކޯއެވެ.

"މޯލްޑިވިއަން ވިމެން ވިތު ފަލަސްތީން" ނަމުގައި ބާއްވާ މި އިވެންޓް ކުރިއަށް ގެންދިއުމަށް ހަމަޖެހިފައި ވަނީ މިއަދު މެންދުރު 14:00 އިން އިރުއޮއްސި 18:00 އާހަމައަށެވެ. ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށްޓަކައި ޖަންބަލް ސޭލެއް ގޮތައް ކުރިއަށް ގެންދިއުމަށް ހަމަޖެހިފައިވާ މިއިވެންޓްގައި، ވިއްކުމަށް ހަމަޖެހިފައިވަނީ އެކި ފަރާތްތަކުން ހަދިޔާކޮށްފައިވާ ތަކެއްޗެވެ. އަދި ފައިސާ ހޯދުމަށް މި އިވެންޓް އޮންނަ ސަރަހައްދުގައި ފުޑް ކޯނާރއެއް ބެހެއްޓުމަށް ވެސް ވަނީ ހަމަޖެހިފައެވެ.

މީގެއިތުރުން ކުޑަކުދިންނަށް ހާއްސަ އެކިކަހަލަ ކުޅިވަރުތައް މިސަރަހައްދުގައި ކުޅެވޭނޭ އިންތިޒާމް ހަމަޖެއްސުމަށް ވެސް ވަނީ ނިނަމާފައެވެ. މަމްސް ޖަމްޢިއްޔާއިން ވަނީ މިއިވެންޓުން ލިބޭ ފައިސާ ފަލަސްތީނަށް އެހީ ފޯރުކޮށްދެމުން އަންނަ އިންޓަނޭޝަލް އެއިޑް ކެމްޕެއިން (އައިއޭސީ)ގެ ފަންޑަށް ހަދިޔާ ކުރުމަށް ނިންމާފައެވެ.

ފަލަސްތީނުގެ ރައްޔިތުންނަށް އެހީވުމަށް އިންޓަރނޭޝަނަލް އެއިޑް ކެމްޕޭން، އައި.އޭ.ސީން ޚާއްސަ ފަންޑެއް ހުޅުވާފައިވާއިރު، މި ފަންޑަށް ގިނަ ފަރާތްތަކުން ދަނީ ފައިސާ ހަދިޔާކުރަމުންނެވެ. އަދި އިޒްރާއީލުން ފަލަސްޠީނަށް ދެމުންދާ އުދުވާނީ ހަމަލާތައް ކުއްވެރިކޮށް ރާއްޖޭގައި ދަނީ ގިނަ ހަރަކާތްތަކެއް ބާއްވަމުންނެވެ.