މިއީ ހަމާސް އާއި އިޒްރޭލު ސިފައިންނާ ދެމެދު ކުރިޔަށްދާ ހަނގުރާމައިގެ 14 ވަނަ ދުވަސް، 20 އޮކްޓޯބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 ޣައްޒާގައި ތިބި އެމެރިކާގެ 10 ރައްޔިތަކަށް ވީނުވީ ނޭންގި އުޅެނިކޮށް، ގަތަރު މެދުވެރިއަކަށްވެ، ހަމާސްގެ ބެލުމުގެ ދަށުގައި ތިބި އެމެރިކާގެ ދެ ރައްޔިތަކު ދޫކޮށްލައިފި. ހަމާސްގެ މި އަމަލަށް ރައީސް ޖޯ ބައިޑަން ވަނީ މަރުހަބާ ކިޔާފަ.

🔴 އިސްރާއީލުން ބައިނަލްއަގްވާމީ ގާނޫނުތަކާ ހިލާފުވެ، ފަލަސްތީނުގެ އަރަބިންގެ މަދަނީ ތަކެއްޗަށް ހަމަލާދީ، ޣައްޒާގެ ބައެއް އާއިލާތައް މުޅިން ފޮހެލާފައިވާކަމަށް ތުހުމަތުކޮށް، އެމްނެސްޓީ އިންޓަނޭޝަނަލް އިން ރިޕޯޓެއް އާންމުކޮށްފި.

🔴 ފަލަސްތީނުގެ ރެޑް ކްރެސެންޓް ސޮސައިޓީން ހާމަކޮށްފައިވާ ގޮތުގައި އިސްރާއީލުން ވަނީ ޣައްޒާ ސިޓީގައި ގެދޮރު ގެއްލިފައިވާ އެތައް ހާސް އާންމުންގެ ހިޔާވަހިކަން ދެމުން އަންނަ އަލް ޤުދުސް ހޮސްޕިޓަލް ހުސްކުރުމަށް ޑިމާންޑްކޮށްފަ.

🔴 އެމެރިކާގެ ކުރީގެ ކޮންގްރެސް މެންބަރު ޖަސްޓިން އަމާޝް ވިދާޅުވީ ޣައްޒާގެ ސެއިންޓް ޕޯފިރިއަސް އޯތޮޑޮކްސް ޗާޗަށް އިސްރާއީލުން ދިން ހަމަލާގައި މަރުވި 18 މީހުންގެ ތެރޭގައި އޭނާގެ ގާތްތިމާގެ މީހުން ހިމެނޭކަމަށް.

🔴 ވޮޝިންޓަން ޑީސީގައި ކުރިއަށް ގެންދިޔަ މަޝްވަރާތަކަށް ފަހު އެމެރިކާ އާއި އީޔޫ ގުޅިގެން ނެރުނު ބަޔާނެއްގައި ބުނެފައި ވަނީ ޣައްޒާގައި އިންސާނީ އެހީއަށް އިންތިހާއަށް ބޭނުންވެފައިކަމަށް. ނަމަވެސް އެ ރިޕޯޓުގައި ހަނގުރާމަ ހުއްޓާލުމަށް ގޮވާލާފައެއް ނުވޭ.

🔴 ޣައްޒާގެ ރައްޔިތުންނަށް ބޭނުންވާ އެހީގެ ތަކެތި ފޯރުކޮށްދިނުމަށް އިސްރާއީލާއި މިސްރާއެކު އެއްބަސްވުމަކަށް އައިސްފައިވާ ކަމުގެ ޔަގީންކަން އެމެރިކާއިން ދިން ނަމަވެސް، މި ތަކެތި އަދިވެސް ރަފާހް ބޯޑަރ ހުރަސްކޮށް ޣައްޒާއަށް ލިބިފައެއްނުވޭ.

🔴 އ.ދ. އިން ހާމަކޮށްފައިވާ ގޮތުގައި އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މަރުވި މީހުންގެ އަދަދު މިހާރު 4،137 އަށް އަރާފައިވޭ، އަދި މަރުވި މީހުންގެ ތެރެއިން 70 އިންސައްތައަކީ އަންހެނުންނާއި ކުޑަކުދިން. މީގެއިތުރުން، ފާއިތުވި 24 ގަޑިއިރުގެ ތެރޭގައި އިސްރާއީލުން ވަނީ ފަލަސްތީނުގެ ގާތްގަނޑަކަށް 352 މީހުން މަރާލާފައި.