އިޒްރާއީލުން ޣައްޒާގެ ރައްޔިތުންނާއި ދެކޮޅަށް ހިންގަމުންދާ ލާއިންސާނީ ޢުދުވާނާއި ދެކޮޅު ހެދުމުގެ ގޮތުން، ދިވެހިން މާލޭގައި ބޮޑު ހިނގާލުމެއް ބާއްވައިފިއެވެ.

ރޭ އިރާކޮޅު މާލޭގައި ބޭއްވި މި ބޮޑު ހިނގާލުން ބޭއްވީ މަޖީދީމަގުގައެވެ. ކުޑަކުދިންނާއި އަންހެނުންނާއި އެކި އުމުރުގެ މީހުން ހިމެނޭގޮތުން މިހިނގާލުމުގައި އެތައް ސަތޭކަ ބަޔަކު ވަނީ ބައިވެރިވެފައެވެ.

ހިނގާލުމުގެ ބައިވެރިން ވަނީ ތަކުބީރު ކިޔައި އަދި ފަލަސްޠީނުގެ މިނިވަން ކަމަށާއި، ރާއްޖެއިން އިޒްރޭލުގެ ޕާސްޕޯޓު ބަލައި ނުގަތުމަށް ވަނީ ގޮވާލާފައެވެ.

އޮކްޓޫބަރުމަހުގެ 8 ވަނަ ދުވަހު، އިޒްރޭލު އަސްކަރިއްޔާއިން ޣައްޒާއަށް ބޮން އަޅަންފެށިތާ 15 ދުވަސް ވީއިރު އިޒްރޭލުގެ ހަމަލާތަކުގައި ފަލަސްޠީނުގެ ކުށެއްނެތް އާއްމުންގެ ތެރެއިން 4000 ވުރެ ގިނަ މީހުން ވަނީ މިހާތަނަށް ޝަހީދުކޮށްލާފައެވެ. އަދި ޣައްޒާއިން ފެނާއި ކަރަންޓާއި މުވާޞަލާތީ ޚިދުމަތްތައް ކަނޑާލައި، ޣައްޒާއަށް ކާބޯތަކެއްޗާއި އެހެނިހެންތަކެތި ވެއްދުން މަނާކޮށް އިޒްރާއީލުންވަނީ ޣައްޒާ ހިޞާރުކޮށްފައެވެ.

ދިވެހި ރައްޔިތުންދަނީ، ފަލަސްޠީނު ރައްޔިތުން ތިބިކަން ހާމަކޮށް ހަރަކާތްތައް ހިންގަމުންނެވެ. މިގޮތުން އިންޓަރނޭޝަނަލް އެއިޑް ކެމްޕެއިން މެދުވެރިކޮށް ޣައްޒާގެ ރައްޔިތުންނަށް އެހީވުމަށް ދިވެހިން ދަނީ، ފައިސާ އެއްކުރުމުގެ ހަރަކާތްތައް ހިންގަމުންނެވެ.