ޣައްޒާގައި ހުރި ދުނިޔޭގެ 3 ވަނައަށް އެންމެ ޤަދީމީ، ކްރިސްޓިއަންފައްޅި, ސެއިންޓް ޕޮޕިރަސް ޗާޗްއަށް އިޒްރޭލުން ހަމަލާދީ، އެފައްޅިން ހިޔާވަހިކޮށް ހޯދައިގެން ތިބި 150 މީހުން މަރާލައިފިއެވެ.

އިޒްރޭލު ސިފައިން މިހަމަލާދީފައި ވަނީ ރޭގެ ދަންވަރުގެ ވަގުތުގައެވެ. 

އިޒްރޭލުގެ ހަތަރު މިސައިލް ހަމަލާއެއް އެ ފައްޅިއަށް އެރިކަމަށް ރިޕޯޓްތައް ބުނެއެވެ. ފައްޅީގައި އޭރު ތިބީ، އިޒްރޭލުން ޣައްޒާއަށް ދެމުންދާ ހަމަލާތަކުން ރައްކާތެރިވުމަށްޓަކައި، އެ ފައްޅީގެ ހިޔާވަހިކޮށް ހޯދައިގެން ތިބި، ހަތަރު ސަތޭކައެއްހައި މީހުންކަމަށާއި އެ މީހުންގެ ތެރޭގައި ނަޞާރާއިންނާއި މުސްލިމުންވެސް ހިމެނޭ ކަމުގައި އަލްޖަޒީރާއިން ވަނީ ބުނެފައެވެ. އޭގެ ތެރެއިން 150ވުރެ ގިނަ މީހުން ވަނީ މަރުވެފައެވެ.

ސެއިންޓް ޕޮޕިރަސް ފައްޅިއަކީ، މީލާދުގެ 5 ވަނަ ޤަރުނުގެ ތެރޭގައި ބިނާކޮށްފައިވާ ފައްޅިއެކެވެ. 

އިޒްރޭލުން ޣައްޒާއަށް ދެމުންދާ ހަމަލާތަކުގައި ދަނީ މިސްކިތްތަކާއި ފައްޅިތަކާއި، ސްކޫލުތަކާއި ހޮސްޕިޓަލްތަކަށް ހަމަލާތައް ދެމުންނެވެ.