ޣައްޒާއަށް އިޒްރޭލުން ދެމުންދާ ހަމަލާތަކުގައި އިންސާނީ އެހީދިނުމުގައި މަސައްކަތް ކުރަމުން އަންނަ އދ.ގެ އިތުރު ދެ މުވައްޒަފަކު މަރާލައިފިއެވެ.

ޣައްޒާއަށް އިޒްރޭލުން ދެމުންގެންދާ ހަމަލާތަކާއި ގުޅޭ ގޮތުން، އދ. ގެ އިންސާނީ އެހީ ދިނުމުގެ ގޮފިން ނެރުނު ބަޔާނުގައި ބުނެފައި ވަނީ، އެޖަމާޢަތުގެ އިތުރު ދެ މުވައްޒަފަކު އިޒްރޭލުގެ ހަމަލާތަކުގައި މަރުވެއްޖެކަމަށާއި، އަދި އިޒްރޭލުގެ ހަމަލާތަކުގައި މަރުވި އެ ޖަމާޢަތުގެ މުވައްޒަފުންގެ އަދަދު މިހާރު، 16އަށް އަރާފައިވާ ކަމަށެވެ. މީގެ އިތުރުން، ހުޅަނގު އައްސޭރީގައި އިޒްރާއީލުން ހިންގަމުންދާ އަސްކަރީ އޮޕަރޭޝަންތަކުގައި، ބައިތުލެހެމްއިން އެކަނިވެސް، 60 މަސައްކަތްތެރިން ހައްޔަރުކޮށްފައިވާ ކަމުގައި ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ (ޔޫ.އެން.ޑަބްލިޔު.އާރް.އޭ) އިން ވަނީ ބުނެފައެވެ. އެހެން ނަމަވެސް، ޣައްޒާއަށް ބޭނުންވާ ތެލާއި ކާބޯތަކެއްޗާއި ފެނާއި ބޭސް ފަދަ ތަކެތި ދެމެހެއްޓެނިވި ގޮތެއްގައި އަދި ހުއްޓުމެއް ނެތި ފޯރުކޮށްދިނުމަށް ޔޫ.އެން.ޑަބްލިޔު.އާރް.އޭ އިން ދަނީ މަސައްކަތް ކުރަމުން ކަމުގައިވެސް އެޖަމާޢަތުން ވަނީ ބުނެފައެވެ.

މީގެ އިތުރުން އެޖަމާޢަތުން ބުނީ، އެޖަމާޢަތުން ޤާއިމްކޮށްފައިވާ ހިޔާތަކުގައި، ބައި މިލިއަނަށްވުރެ ގިނަ މީހުން ދިރިއުޅެމުންދާ ހިޔާތައް ވަނީ ފުރި ތޮއްޖެހިފައި ކަމަށެވެ.  އަދި ގެދޮރު ގެއްލުނު ބައެއް މީހުން އެނބުރި އެހެން ސަރަހައްދުތަކަށް ދާން ފަށާފައިވާ ކަމަށްވެސް ޔޫ.އެން.ޑަބްލިޔު.އާރް.އޭ އިން ވަނީ ބުނެފައެވެ.

އިޒްރޭލުގެ ހަމަލާތަކުގައި، ޔޫ.އެން.ޑަބްލިޔު.އާރް.އޭގެ މުވައްޒަފުން މަރަމުން ދިޔުމުގެ އިތުރުން، އިޒްރާއީލުން ވަނީ، އިންސާނީ އެހީގެތަކެތި ގުދަންކޮށްފައި ހުރި، ޔޫ.އެން.ޑަބްލިޔު.އާރް.އޭގެ ވެއާހައުސްތަކަށްވެސް ހަމަލާދީފައެވެ.

ފަލަސްޠީނުގެ ރައްޔިތުންނާއި ދެކޮޅަށް، އިޒްރާޢީލުން ހިންގަމުންދާ އުދުވާނަށް 14 ދުވަސް ވީއިރު، މިހާތަނަށް އިޒްރޭލުގެ ހަމަލާތަކުގައި ފަލަސްޠީނުގެ 3،785 މީހުން ޝަހީދުވެ 12،493 މީހުން ވަނީ ޒަޚަމްވެފައެވެ.