ކުރިއަށް އޮތް 2 ދުވަހުވެސް އުތުރުގެ ރަށްތަކަށް މޫސުން ގޯސްވާނެކަމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް) އޮފީހުން ވިދާޅުވެއްޖެއެވެ. މެޓް އޮފީހުން ވިދާޅުވީ، ކުރިއަށްއޮތް 24 ގަޑިއިރުވެސް ރާއްޖޭގެ އުތުރުގެ ބޮޑުބަޔަކަށް ގުގުރުމާއެކު، ބޯކޮށް ވާރޭވެހޭނެކަމަށެވެ. އަދި މާދަމާވެސް އުތުރުގެ ރަށްތަކަށް ވިއްސާރަކުރާނެކަމަށެވެ.

މެދުރާއްޖެތެރޭގެ ބައެއް އަތޮޅުތަކަށްވެސް ގުގުރުމާއެކު ވިއްސާރަ ކުރާނެ ކަމަށް މެޓްއޮފީހުން ވަނީ ލަފާކޮށްފައެވެ. ނަމަވެސް ދެކުނުގެ އަތޮޅުތަކަށް މޫސުން ރަނގަޅުވާނެކަމަށް އެ އިދާރާއިން ލަފާކުރެއެވެ.

ފާއިތުވި 24 ގަޑިއިރުގެ ތެރޭގައި އެންމެ ބޯކޮށް ވާރޭވެހުނީ ށ. ފުނަދޫއަށެވެ. އެ ރަށަށް 50.4 މިލިމީޓަރުގެ ވާރޭ ވެހިފައިވެއެވެ. ދެން އެންމެގިނައިން ވަރޭވެހިފައިވަނީ ށ.ކޮމަންޑޫއަށެވެ. އެއީ 28.9 މިލިމީޓަރުގެ ވާރެއެވެ.

ވޭތުވެދިޔަ 24 ގަޑިއިރު ހުޅުލެއަށް 24.5 މިލިމީޓަރުގެ ވާރޭ ވެހިފައިވާކަމަށް ރިކޯޑްކުރެވިފައިވެއެވެ. ރާއްޖެއަށް މިހާރު ކުރަމުންދާ ވިއްސާރާގައި ބައެއް ރަށްތަކަށް ބޯކޮށް ވާރޭވެހި އެކިވަރުގެ ގެއްލުންތައް އަންނަނީ ލިބެމުންނެވެ. އެހެންކަމުން މޫސުމަށް ސަމާލުވެ ގެދޮރާއި ހިފާ ގެންގުޅޭ ތަކެއްޗަށް ރައްކާތެރިވުމަށް ވަނީ އިލްތިމާސްކޮށްފައެވެ.