ށ. ނަލަންދޫގައި ރިސޯޓެއް ތަރައްގީކުރާނެ ބަޔަކު ހޯދަން ޓޫރިޒަމް މިނިސްޓްރީން އިއުލާންކޮށްފިއެވެ. މިއީ މިރަށް ބީލަމަށް ހުޅުވާލި 2 ވަނަ ފަހަރެވެ.

ގުދުރަތީ ގޮތުން ހާއްސަ ސިފަތަކެއް ލިބިފައިވާ ނަލަންދުއަކީ ގިނަ އަހަރުތަކެއް ވަންދެން ލަނޑާ އާލާކުރާ ބަޔަކަށް ކުއްޔަށް ދޫކޮށްފައި އޮތް ރަށެކެވެ. ނަމަވެސް މި ސަރުކާރުން ވަނީ އެ ރަށް އެ މީހުންގެ އަތުން އަތުލައި، ބަދަލު ދިނުމަށް ފަހު، ޓޫރިޒަމަށް ހާއްސަކޮށްފައެވެ.

ރައީސް އިބްރާހިމް މުހައްމަދު ސާލިހްގެ ސަރުކާރުން މި މަސައްކަތް ފެށީ 2021 ވަނަ އަހަރު ރައީސް ށ. އަތޮޅަށް ކުރެއްވި ދަތުރުފުޅުގެ ތެރެއިން އެ އަތޮޅުގެ ރަށްރަށުގެ ކައުންސިލްތަކުން ހުށަހަޅައިގެންނެވެ.

ނަލަންދޫގައި ރިސޯޓެއް ތަރައްގީކުރާނެ ބަޔަކު ހޯދަން ފުރަތަމަ އިއުލާން ކުރީ މި އަހަރުގެ އޮގަސްޓުގައެވެ. ޓޫރިޒަމް މިނިސްޓްރީން އަލުން މިރަށް ބީލަމަށް ލާފައިވާއިރު އިއުލާނުގައިވާ ގޮތުގައި އަންނަ މަހުގެ ހައެއްގެ ކުރިން މިނިސްޓްރީއަށް ހާޒިރުވެ ބީލަން ހުށަހަޅަން ޖެހެއެވެ.

ރިސޯޓް ތަރައްޤީކުރަން މިހާރުވެސް ގިނަ ރަށްރަށެއް ވަނީ ދޫކޮށްފައެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް ވަނީ އަލަށް 5 ރިސޯޓެއް ހުޅުވާފައެވެ. އަދި އަހަރުގެ ކުރިއަށްއޮތް ތަނުގައި 4 ރިސޯޓެއް ހުޅުވުމަށް ހަމަޖެހިފައިވާކަމަށް އެ މިނިސްޓްރީން ވަނީ ބުނެފައެވެ. 

މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި މިވަގުތު 172 ރިސޯޓެއް އަންނަނީ ހުޅުވައި ހިދުމަތް ދެމުންނެވެ. އެއީ މުޅި ޖުމްލަ 42،159 އެނދެވެ.