ފުރަތަމަ މަރުހަލާގައި މަސްތުވާތަކެތި ދެނެގަތުމަށް ބޭނުންކުރާ ޓެސްޓްކިޓްތަކެއް ޖަޕާނުން ދިވެހި ފުލުހުންނަށް ހަދިޔާކޮށްފިއެވެ.

މިޓެސްޓް ކިޓްތައް ދިވެހި ފުލުހުންނަށް ޖަޕާނުން ހަދިޔާކޮށްފައި ވަނީ ޔޫއެންއޯޑީސީ މެދުވެރިކޮށެވެ. 

ޖަޕާން ސަރުކާރުގެ އެހީގައި ހަދިޔާކުރި ޑްރަގް އަދި ޕްރިކަރސަރ ފީލްޑް ޓެސްޓް ކިޓުތަކަކީ، މަސްތުވާތަކެތި ދެނެގަތުމަށްޓަކައި ބޭނުންވާ ރިއެޖަންޓް ޓޫލްސް ހިމެނިގެންވާ ވޯޓަރ ރެސިސްޓަންޓް ކިޓުތަކެއް ކަމަށާ، މި ކިޓުތަކުގެ އެހީގައި، މަސްތުވާތަކެތީގެ ބާވަތްތަކާއި އެކުލެވިގެންވާ މާއްދާތައް ކުޑަ ހިނދުކޮޅެއްގެ ތެރޭގައި ދެނެގަނެވޭނެކަމުގައި މޯލްޑިވްސް ޕޮލިސް ޕޮލިސް ސަރވިސް އިން ވަނީ ބުނެފައެވެ.

މޯލްޑިވްސް ޕޮލިސް ސަރވިސްއިން ބުނީ، މި ޓެސްޓް ކިޓުތަކުގެ ސަބަބުން ފްރޮންޓްލައިން އޮފިސަރުންގެ މަސައްކަތްތައް ފަސޭހަވެގެންދިއުމާއި ފީލްޑް އޮފިސަރުންނަށް ކްރައިމް ސީންގައި ހުންނަ ޝައްކުކުރެވޭ ތަކެތި ފަސޭހަކަމާއެކު ދެނެގަނެވޭނެ ކަމަށެވެ.

ޖަޕާން ސަރުކާރުގެ އެހީގައި ޔޫއެންއޯޑީސީގެ ފަރާތުން ދިވެހި ފުލުހުންގެ ޚިދުމަތަށް ޑްރަގް އަދި ޕްރިކަރސަރ ފީލްޑް ޓެސްޓް ކިޓް ހަދިޔާކުރުމުގެ ރަސްމިއްޔާތު ބާއްވާފައި ވަނީ، އިއްޔެ އިސްކަންަރު ބިލްޑިންގގައެވެ.