ފަލަސްތީނުގެ ރައްޔިތުންނަށް އެހީވުމަށް ކުރިއަށް ގެންދިޔަ ޓެލެތޯންއަށް 12 މިލިއަނަށްވުރެ ގިނަ ރުފިޔާ ލިބިއްޖެއެވެ. މި ޓެލެތޯންއަކީ އިންޓަނޭޝަނަލް އެއިޑް ކެމްޕެއިން، އައިއޭސީއާއި ދިވެހި ބައެއް މީޑިއާތައް ގުޅިގެން ކުރިއަށްގެންދިޔަ ޓެލެތޯންއެކެވެ.

13 ގަޑިއިރަށް ކުރިއަށްގެންދިޔަ ޓެލެތޯން ނިންމާލިއިރު ފަލަސްތީނުގެ ރައްޔިތުންނަށް އެހީވުމަށް ރާއްޖެއިން ގާއިމްކޮށްފައިވާ ފަންޑަށް އެހީގެ ގޮތުގައި ވަނީ 12.5 މިލިއަން ރުފިޔާ ވަނީ ލިބިފައެވެ. އަދި 8300އަށްވުރެ ގިނަ ޑޮލަރު އެހީގެ ގޮތުގައި ޖަމާކޮށްފައިވެއެވެ. 

ފޮޓޯ: އައިއޭއެސް

މި ޓެލެތޯންގެ ތެރެއިން ވަނީ ފަލަސްތީނުގެ ތާރީޚީ ވާހަކަތަކާއި، އިސްރާއީލުންް ފަލަސްތީނުގެ ބިންތައް ހިފާ ހިންގަމުންދާ ޖަރީމާތަކަށް އަލިއަޅުވާލާ އެކިއެކި ވީޑިއޯ ރިޕޯޓްތައް ގެނެސްދީފައެވެ. އަދި ފަލަސްތީނުގެ ރައްޔިތުންނަށް އެހީވުމަށް އިންޓަނޭޝަންލް އެއިޑް ކެމްޕެއިންގެ ފަރާތުން، ޕަލަސްތީނުގައި ކުރިއަށްގެންދާ އޮޕަރޭޝަންތަކާއި ގުޅޭ މަޢުލޫމާތު ތަފްސީލީގޮތެއްގައި ވަނީ ގެނެސްދީފައެވެ. 

ފަންޑަށް ފައިސާ ހޯދުމަށް ކުރިއަށްގެންދިޔަ ހަރަކާތްތަކުގައި އެކިއެކި ޖަމިއްޔާ ޖަމާތްތަކާއި، ކުންފުނިތަކާއި އަދި ގިނަ އަދަދަކަށް އާއްމުން ބައިވެރިވެފައިވެއެވެ. އެގޮތުން މާލޭގެ އެކި ސަރަޙައްދުތަކުގައި ފަންޑު ފޮށި ބަހައްޓައިގެން، ފައިސާ ހޯދުން ކުރިއަށް ގެންގޮސްފައިވެއެވެ. މީގެ އިތުުރުން ސައިިކަލު ދޮވުމާއި، ކޭކާއި ހެދިކާއާއި އެކި ކަހަލަ ސާމާނު ވިއްކައިގެން ލިބުނު ފައިސާވެސް މި ފަންޑަށް ވަނީ ޖަމާކޮށްފައެވެ.  

ފޮޓޯ: އައިއޭއެސް

މިހާތަނަށް ލިބިފައިވާ 12.5 މިލިއަން ރުފިޔާއަކީ އޮންލައިން ޓްރާންސެކްޝަންތަކުން ލިބުނު ފައިސާކަމަށެވެ. އަދި ފަންޑު ފޮށިތަކުން ލިބުނު ފައިސާ ގުނައި، އެއްކުރެވިގެން ދިއުމާއެކު މި އެހީގެ ޢަދަދު އިތުވާނެކަމަށް މިހަރަކާތް އިންތިޒާމްކުރާ ފަރާތްތަކުން ބުނެެެެއެވެ. މި ހަރަކާތުގައި ބައިވެރިވެ އަތޮޅުތަކުގެ ރަށްތަކުގައިވެސް ވަނީ ފަންޑު ފޮށި ބަހައްޓާ، ފަލަސްތީިނާއި ޣައްޒާގެ ރައްޔިތުންނަށް އެހީވުމުގެ ހަރަކާތްތައް ކުރިއަށްގެންގޮސްފައެވެ.