އައު ސަރުކާރުވާނީ އިސްލާމްދީނާއި ދިވެހިންގެ ޤައުމިއްޔަތަށް އެންމެ އިސްކަންދޭ ވެރިކަމަށް ކަމުގައި އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އިންތިޚާބީ ރައީސް ޑރ. މުޙައްމަދު މުއިއްޒު މިހެން ވިދާޅުވީ، މިއަދު ފާހަގަކުރާ ރާއްޖެ އިސްލާމްވި ދުވަހުގެ މުނާޞަބަތާއި ގުޅުވައިގެން ނެރުއްވި ބަޔާނުގައެވެ.

އެމަނިކުފާނުގެ ބަޔާނުގައި ވިދާޅުވީ، 17 ނޮވެމްބަރު 2023ގައި ޤާއިމްވާ، ޕީޕީއެމް-ޕީއެންސީ އަދި ގުޅިފައިވާ ޕާޓީތައް ބައިވެރިވާ ސަރުކާރު ވާނީ، އިސްލާމްދީނާއި ދިވެހިންގެ ޤައުމިއްޔަތަށް އެންމެ އިސްކަންދޭ ވެރިކަމަށް ކަމަށެވެ. އަދި މިޤައުމުގެ އިސްތިޤުލާލާއި، ފަޚުރުވެރިކަން ނަގަހައްޓައިދޭ، ދިވެހިންގެ ރީތި އުޅުމާއި ގުޅުމާއި ގޮތްފޮތް ދަމަހައްޓައި، ދިވެހީންގެ ނަމާއި އަބުރު ބައިނަލްއަޤުވާމީ މަސްރަހްގައި އުފުލައިދޭނެ ސަރުކާރަށްވެސް އެސަރުކާރު ވާނެ ކަމުގައި އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވިއެވެ.

އިންތިޚާބީ ރައީސް ޑރ. މުޙައްމަދު މުއިއްޒުގެ ޚިޠާބުގައި ވިދާޅުވީ، އިސްލާމްދީން މަތީގައި ދިވެހިން ފައިތިލަ ސާބިތު ކުރިތާ 9 ޤަރުނު ފުރިހަމަވާން ބާކީ އޮތީ ތިން އަހަރުކަމަށްވާއިރު، ދިވެހިރާއްޖެއަށް އެންމެ ހެޔޮ ބަދަލުތައް ގެނުވި ތާރީޚީ ހާދިސާއަކީ ރާއްޖެ އިސްލާމްވުން ކަމަށެވެ. ދިވެހީންގެ މިނިވަންކަމާއި، ރިވެތި އާދަކާދަތާކާއި، މުއްސަނދި ޘަޤާފަތާއި އެއްބައިވަންތަ ކަމުގެ ޙަޤިޤީ ނާރެހަކީވެސް މާތްވެގެންވާ އިސްލާމްދީން ކަމުގައި އެމަނިކުފާނުގެ ޚިޠާބުގައި ވިދާޅުވިއެވެ.

މީގެ އިތުރުން، އިންތިޚާބީ ރައީސް ޑރ. މުޙައްމަދު މުއިއްޒުގެ ބަޔާނުގައި ވިދާޅުވީ، ވޭތުވެދިޔަ ދިގު މާޒީގައި، ސައްތައިން ސައްތަ މުސްލިމް ޤައުމެއްގެ ގޮތުގައި، އަޅުގަނޑުމެން ދެމި ތިބިކަމީ މުޅިދުނިޔެއަށް ނަމޫނާއެއް ކަމަށެވެ.  އަދި މިއަދު ދުނިޔޭގައި ފިކުރީ ގޮތުންނާއި އިޤުތިޞާދީ ގޮތުންނާއި، އަދި އިސްތިރާތީޖީ ގޮތުންވެސް ތަފާތު ގޮންޖެހުންތައް ދިވެހިރާއްޖެއަށް އޮތްކަން  އެމަނިކުފާނުގެ ޚިޠާބުގައި ވަނީ ފާހަގަކުރައްވާފައެވެ. އަދި އެއިން ކޮންމެ ގޮންޖެހުމަކާއި ކުރިމަތިލައި، ދިވެހި ޤައުމު އިސްކޮށް، ދިވެހިންގެ މަސްލަޙަތު ކުރިިޔަށް ނެރުމަކީ ދިވެހީން އެދޭ ގޮތްކަމުގައިވެސް އިންތިޚާބީ ރައީސް ޑރ. މުޙައްމަދު މުއިއްޒު ވަނީ ވިދާޅުވެފައެވެ.

ދިވެހިރާއްޖެ އިސްލާމްވި ދުވަހުގެ ގޮތުގައި ފާހަގަކުރަނީ ކޮންމެ އަހަރެއްެވެސް ރަބީޢުލްއާޚިރު މަހުގެ 2 ވަނަ ދުވަހެވެ.