މިދިޔަ އަހަރު ދައުލަތަށް ލިބުނު އާމްދަނީ 19.7 އިންސައްތަ އިތުރުކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީންގެ މިދިޔަ އަހަރުގެ ބަޖެޓު ނަތީޖާގެ ބަޔާނުގައި ވަނީ ބަޖެޓުގައި ލަފާކުރި އަދަދަށްވުރެ މިދިޔަ އަހަރު ދައުލަތަށް ލިބުނު އާމްދަނީ އިތުރުކަމަށެވެ.

މިދިޔަ އަހަރަށް ރައްޔިތުންގެ މަޖިލީހުން ފާސްކުރި ބަޖެޓުގައި އާމްދަނީއާއި ހިލޭ އެހީގެ ގޮތުގައި ދައުލަތަށް ލިބޭނެކަމަށް އަންދާޒާކޮށްފައިވަނީ 24.2 ބިލިއަން ރުފިޔާއެވެ. އެހެންނަމަވެސް މިދިޔަ އަހަރު ނިމުނުއިރު އާމްދަނީއާއި ހިލޭ އެހީގެ ގޮތުގައި ޖުމުލަ 29.1 ބިލިއަން ރުފިޔާ ދައުލަތަށް ވަނީ ލިބިފައެވެ. މިއީ މިދިޔަ އަހަރަށް ފާސްކުރި ބަޖެޓުގައި ހިމަނައިފައިވާ އަންދާޒާއާއި އަޅައިބަލާއިރު 19.7 އިންސައްތަ އިތުރު އަދަދެކެވެ.

ކޯވިޑް ކޮންޓްރޯލުކުރުމަށް ސަރުކާރުން އެޅި ހަރުދަނާ ފިޔަވަޅުތަކާއެކު، އެ ބަލިމަޑުކަން 2021 ވަނަ އަހަރުގެ ތެރޭގައި ކޮންޓްރޯލުކުރެވި، އެ އަހަރުގެ ތެރޭގައި ޤައުމުގެ އިޤްތިޞާދީ ޙާލަތު ކުރީގެ އަންދާޒާތަކަށްވުރެ ރަނގަޅުވެފައިވާކަމަށް މި ބަޔާނުގައި ބުނެފައިވެއެވެ.

މިދިޔަ އަހަރަށް ފާސްކުރި ބަޖެޓުގައި ހިމަނައިފައިވާ އަންދާޒާއަށްވުރެ އެ އަހަރުގެ ތެރޭގައި ދައުލަތަށް ލިބުނު އާމްދަނީ އިތުރުވި މައިގަނޑު އެއް ސަބަބަކީ ރާއްޖެއަށް ޒިޔާރަތްކުރި ފަތުރުވެރިންގެ އަދަދު، ކުރިން ލަފާކުރި މިންވަރަށްވުރެ އިތުރުވުމެވެ.

މި ބަޔާނުގައި ބުނެފައިވަނީ ޓެކުހުގެ ގޮތުގައި މިދިޔަ އަހަރު ދައުލަތަށް ލިބުނު އާމްދަނީ ކުރިން އަންދާޒާކުރި މިންވަރަށްވުރެ އިތުރެވެ، ރިސޯޓުތަކުގެ ކުލީގެ ގޮތުގައި ލިބޭ އާމްދަނީއާއި ބިންވިއްކުމާއި ބިން ބަދަލުކުރުމުގެ ފީ، އަންދާޒާކުރި ވަރަށްވުރެ އިތުރުވެފައިވާތީ، ޓެކްސް ނޫން އާމްދަނީގެ ގޮތުގައި މިދިޔަ އަހަރުގެ ނިޔަލަށް ދައުލަތަށް ލިބުނު އާމްދަނީވެސް ވަނީ އަންދާޒާކުރި މިންވަރަށްވުރެ އިތުރުވެފައިވާކަމަށެވެ.

މިދިޔަ އަހަރު ޖީ.އެސް.ޓީގެ ގޮތުގައި 3.1 ބިލިއަން ރުފިޔާ ދައުލަތަށް ވަނީ ލިބިފައެވެ. މިއީ މިދިޔަ އަހަރަށް ފާސްކުރި ދައުލަތުގެ ބަޖެޓުގައި ހިމަނައިފައިވާ އަންދާޒާއާ އަޅައިބަލާއިރު 10.7 އިންސައްތަ އިތުރު އަދަދެއް ކަމަށް ބަޖެޓު ނަތީޖާ ބަޔާނުގައި ފާހަގަކޮށްފައިވެއެވެ.