މިއީ ހަމާސް އާއި އިޒްރޭލު ސިފައިންނާ ދެމެދު ކުރިޔަށްދާ ހަނގުރާމައިގެ 9 ވަނަ ދުވަސް، 15 އޮކްޓޯބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 ފަލަސްތީނަށް ދެމުންގެންދާ ބޮމުގެ ހަމަލާތަކުގެ އިތުރުން، ޣައްޒާގެ ބޯޑަރު ފެންސުކައިރިއަށް އިސްރާއީލުން ވަނީ އެމީހުންގެ ހަނގުރާމަވެރި ޓޭންކްތަކާއި ހަތިޔާރުތައް ގެނަސް، ޣައްޒާގެ ބިން ބަލާފާސްކޮށް، ހަމާސް ނައްތާލުމަށްކަމަށް ބުނެ އެ ރަށަށް އެރުމަށް ތައްޔާރުވެފައި. 

🔴 ފަލަސްތީނުގެ ރެފިއުޖީންނަށް އެހީދޭ އދ.ގެ އިދާރާއިން ބުނާ ގޮތުގައި އިސްރާއީލާއެކު ހިނގަމުންދާ ހަނގުރާމައިގެ ފުރަތަމަ ހަތް ދުވަހު ގާތްގަނޑަކަށް ޣައްޒާގެ އެއް މިލިއަން ފަލަސްތީނު މީހުންގެ ގެދޮރު ގެއްލިފައިވޭ. 

Advertisement

🔴 އީރާނުގެ ފޮރިން މިނިސްޓަރު ހުސެއިން އަމީރު އަބްދުالله، އަލްޖަޒީރާއަށް ދިން އިންޓަވިއުއެއްގައި ވިދާޅުވީ، އެ ގައުމުން އަބަދު ހަނގުރާމައިގެ އޮބްޒާވަރެއްގެ ގޮތުގައި ނޯންނާނެ ކަމަށް. އަދި ހަމަނުޖެހުން އިތުރަށް ބޮޑުވެގެންދާނަމަ އިސްރާއީލާއި އެމެރިކާއަށް ބޮޑެތި ގެއްލުންތަކެއް ދޭނެކަމުގެ އިންޒާރު ވެސް އިރާނުން ދީފައިވޭ.

🔴 އިސްރާއީލުން ދިން ބޮމުގެ ހަމަލާތަކުގައި ޣައްޒާގެ ގިނަ ފެން ހޮޅިތަކަށް ބޮޑެތި ގެއްލުންތައް ލިބިފައިވާއިރު، ފަލަސްތީނުގެ ރައްޔިތުން ބުނަނީ އިސްރާއީލުން ޣައްޒާގެ ދެކުނަށް ފެން ފޯރުކޮށްދޭން އިއުލާން ކުރުމަކީ އެމީހުންގެ "ޕަބްލިސިޓީ ސްޓަންޓެއް" ކަމަށް. 

🔴 ޔޫރަޕިއަން ޔޫނިއަންގެ ގައުމީ ލީޑަރުން އިސްރާއީލުގެ ހަމަލާތަކަށް ތާއީދުކޮށް ނެރެފައިވާ ބަޔާނެއްގައި ބުނެފައިވަނީ، އިންސާނީ އަދި ބައިނަލްއަގްވާމީ ގާނޫނުތަކާ އެއްގޮތަށް، އިސްރާއީލުގެ ސިފައިން އެ ކުރަނީ އެ ގައުމުގެ ރައްޔިތުން ދިފާއުކުރުމުގެ ގޮތުން ކުރާ ހަނގުރާމައެއްކަމަށް. 

🔴 އިސްރާއީލުން ދިން ވައިގެ ހަމަލާތަކުގައި ފަލަސްތީނުގެ 2،670 މީހުން މަރުވެފައިވާއިރު، އޭގެ ތެރެއިން ތިންބައިކުޅަ އެއްބަޔަކީ ކުޑަކުދިން. އަދި މަދުވެގެން ޣައްޒާގެ 50 އާއިލާއެއް އެ ގައުމުގެ ސިވިލް ރަޖިސްޓްރީން އެއްކޮށް ފޮހެވިގެން ގޮސްފައިވާކަމަށް ހެލްތު މިނިސްޓްރީން ބުނެފައިވޭ. ހަމާސްގެ އަސްކަރީ އޮޕަރޭޝަންގައި މަރުވި އިސްރާއީލުގެ މީހުންގެ އަދަދު 1،400 އަށް އަރާފައިވާއިރު، އޭގެ ތެރޭގައި 286 ސިފައިން ހިމެނޭ.