ރާއްޖެއިން ބޭރުން އައްޑޫ ސިޓީއަށް މުދާ ގެނައުމަށް މޯލްޑިވްސް ސްޓޭޓް ޝިޕިން، އެމްއެސްއެސް އިން ގަނެފައިވާ ކޮންޓެއިނަރ އުފުލާ ބޯޓު، މުދަލާއި އެކު ފުރަތަމަ ފަހަރަށް ހޮނިހިރު ދުވަހު އައްޑޫގައި ބަނދަރުކޮށްފިއެވެ.

އައްޑޫއަށް އެމްއެސްއެސް އޯޕަލް ބަނދަރުކޮށްފައިވަނީ ބޭރު ޤައުމުތަކުން މާލޭ ކޮމާޝަލް ބަނދަރަށް ގެނެސްފައިވާ މުދާތަކުގެ ތެރެއިން، އައްޑޫއަށް ގެންދިޔުމަށް ހުރި މުދަލާއެކުއެވެ. އެމްސްއެސްއިން ބުނީ، ކޮންމެ 10 ދުވަހަކުން މި ބޯޓު މުދަލާއެކު އައްޑޫއަށް ދަތުރުކުރާނެ ކަމަށެވެ. މި ބޯޓު ދަތުރުކުރާނީ މާލެ، ހިތަދޫ، ކޫއްޑޫ އަދި މާލެ ރޫޓުންނެވެ.

އެމްއެސްއެސް އޯޕަލްގެ ނަމުން ނަންދީފައިވާ މިބޯޓަކީ 20 ރީފާ ކޮންޓެއިނަރު ހިމެނޭހެން ޖުމްލަ 105 ކޮންޓެއިނަރު އުފުލޭ ބޯޓެކެވެ. މި ބޯޓުގައި ކްރޭންގެ އިތުރުން ސިމެންތިއާއި، ވެލި ފަދަ ސާމާނު އުފުލުމަށް ދެ ފަލްކާވެސް ހުރެއެވެ. މި ބޯޓުގެ ދިގުމިނުގައި 67.2 މީޓަރު ހުރެއެވެ.

އެކުންފުނިން ބުނީ، ކުރިއަށްއޮތްތަނުގައިވެސް ވިޔާފާރިވެރިން މާލެއިން މުދާ ގަނެގެން، އައްޑޫއަށް ކޮންޓެއިނަރުގައި ގެންދިޔުމުގެ އިންތިޒާމް ހަމަޖެހިގެންދާނެ ކަމަށެވެ. އެމްއެސްއެސްއިން 2020 ވަނަ އަހަރުގެ އޮކްޓޯބަރ މަހުވެސް ވަނީ އިންޑިއާގެ ޓުޓްކޮރިންއިން އައްޑޫ ސިޓީއަށް ދަތުރު ކޮށްފައެވެ.