ފީފާ ވޯލްޑް ކަޕް/ އޭޝިއަން ކަޕް ފުޓްބޯޅަ މުބާރާތުގެ ޖޮއިންޓް ކޮލިފައިން ޕްރިލިމިނަރީ ބުރުގެ ފުރަތަމަ ލެގުގައި ދިވެހި ރާއްޖެ އާއި ބަނގުލަދޭޝް ބައްދަލުކުރި މެޗު 1-1 އިން އެއްވަރުވެއްޖެއެވެ. ރާއްޖޭގެ ގަލޮޅުދަނޑުގައި ކުޅުނު މި މެޗުގައި ގިނަ އަދި ނުރައްކާތެރި ފުރުސަތުތަކެއް ތަނަވަސްކުރިތަން ފެނުނީ ދިވެހި ކުޅުންތެރިންނެވެ. އަދި މޮޅަކުން މެޗު ނިންމާލަން ދަނިކޮށް، މެޗުގެ ފަހު މިނެޓުގައި ބަނގުލަދޭޝް ހަމަހަމަ ކުރީއެވެ.

މެޗުގެ ބޮޑު ބައިގައި ރާއްޖެ ޓީމަށް ލިބުނު ގިނަ ފުރުސަތުތައް ކާމިޔާބެއް ނުކުރެވުނެވެ. އަދި ރާއްޖޭން ކާމިޔާބު ކުރި ގޯލު ކާމިޔާބު ކޮށްފައިވަނީ މެޗުގެ  86 ވަނަ މިނިޓްގައި ބަދަލަކަށް ކުޅެން އެރި ހަސަން ނަޒީމް ގާސިމް (ޗޯޓު) އެވެ. މިއީ އޭރިއާތެރެއިން ބަންގްލަދޭޝް ޑިފެންޑަރުންނަށް ސަލާމަތްނުކުރެދިޔަ ބޯޅައެއް ކުޑައޭރިއާ ރޮނގުމަތިން ލިބުމާ އެކު، ހަމަޖެހިލައިފައި ގޯލަށް ފޮނުވާލައިގެން ޗޯޓު ޖެހި ގޯލެކެވެ.

ބަނދުލަދޭޝްއިން އެއްވަރު ކުރި ގޯލު ކާމިޔާބު ކުރީ މެޗުގެ އިތުރު މިނެޓުގައެވެ. އެ ޓީމަށް ވެސް ގޯލު ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ކުޅުން ތެރިއެކެވެ. މިއީ އަރިމަތިން ރަކީބް ބޯޅަ ހިފައިގެން އޭރިއާތެރެއަށް ވަދެ ހުރަސްކޮށްލި ބޯޅައަށް ހުސްކޮށް އަރައި، ސާދް އުއްދީން ކާމިޔާބު ކުރި ގޯލެކެވެ.

ގްރޫޕް ސްޓޭޖަށް ކޮލިފައިވާ ޓީމު އެނގޭނީ މި މަހު 17 ވަނަ ދުވަހު ބަންގްލަދޭޝްގެ ސިލްހެޓްގެ ބަޝުންދަރާ އެރީނާގައި ކުޅޭ ދެވަނަ ލެގުންނެވެ. ރާއްޖޭގައި މި ކުޅުނު މެޗުގެ ނަތީޖާއާއެކު، ބަނގުލަދޭޝް މެޗުން ކޮންމެ ޓީމެއް މޮޅުވި ނަމަވެސް އެ ޓީމެއް ގްރޫޕް ސްޓޭޖަށް ދަތުރު ކުރާނެއެވެ.