މަތިވެރިދާއިރާގެ މެމްބަރު ޙަސަން ޒަރީރަށް ހަމަލާދީ މާރާމާރީ ހިންގި މައްސަލައިގައި ދެމީހަކު ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، މެމްބަރު ޒަރީރަށް ހަމަލާދީ މާރާމާރީ ހިންގި މައްސަލައިގައި ހައްޔަރުކޮށްފައި ވަނީ، އުމުރުން 21 އަހަރާއި 22 އަހަރުގެ ދިވެހި ދެފިރިހެނުން ކަމަށެވެ. އެދެމީހުން ހައްޔަރުކޮށްފައި ވަނީ ކޯޓު އަމުރެއްގެ ދަށުން ބުރާސްފަތި ދުވަހުގެ ރޭގައި ކަމަށްވެސް ފުލުހުން ވިދާޅުވިއެވެ.

މީގެ އިތުރުން އެމީހުންގެ ބަންދާއި މެދު ގޮތެއް ނިންމުމަށް ކޯޓަސް ހާޟިރުކުރުމުން އެ ދެމީހުންގެ ބަންދަށް ކްރިމިނަލްކޯޓުން 15 ދުވަސް ޖަހައިދީފައިވާ ކަމުގައި ފުުލުހުންގެ ޚިދުމަތުން ވިދާޅުވިއެވެ.

މެމްބަރު ޒަރީރަށް ހަމަލާދީފައި ވަނީ މެއި 1 ވަނަ ދުވަހުގެ 05:08 ހާއިރު، ބުރުޒުމަގުން ޓީވީމޯލްޑިވުސްގެ އަނެއް ކަންމައްޗަށް ވާގޮތަށް ހުރި، ޙަބީބީ ކެފޭ އެންޑް ބިސްޓްރޯގެ ތެރޭގައި އޭނާ އިންނަވަނިކޮށެވެ. މާރާމާރީ އާއި ގުޅިގެން މެމްބަރު ޒަރީރަށް އޭޑީކޭ ހޮސްޕިޓަލްގައި ވަނީ ފަރުވާވެސް ދީފައެވެ.