މޯލްޑިވްސް ޓްރާންސްޕޯޓިންގ ކޮމްޕެނީ، އެމްޓީސީސީގެ 42 އަހަރުގެ ދިގު ތާރީހުގައި ވެސް ހިއްސާދާރުންނަށް ފައިދާގެ ގޮތުގައި އެންމެ ގިނަ ފައިސާ ބަހާނެ އަހަރަކީ މިއަހަރު ކަމަށާއި، ޙިއްޞާގެ ފައިދާގެ ގޮތުގައި، 32.15 މިލިއަން ރުފިޔާ ހިއްސާދާރުންނަށް ބެހުމަށް އަހަރީ އާންމު ޖަލްސާއަށް ހުށަހެޅުމަށް ޑިރެކްޓަރުންގެ ބޯޑުން ނިންމާފައިވާ ކަމުގައި އެމްޓީސީސީން ބުނެފިއެވެ.

އެކުންފުނިން މިއަދު ވަނީ އެކުންފުނީގެ އަހަރީ ތަފާސް ޙިސާބުތަކާއި އަހަރީ ރިޕޯޓް އާއްމުކޮށްފައެވެ. އަހަރީ ރިޕޯޓުގައި ބަޔާންކޮށްފައިވާ ގޮތުން، 2022 ވަނަ އަހަރު އެކުންފުނިން ވަނީ، 2.47 ބިލިއަން ރުފިޔާގެ ވިޔަފާރިކޮށްފައެވެ. އަދި ހަމައެއަހަރު ފައިދާގެ ގޮތުގައި، 324.16 މިލިޔަން ރުފިޔާ ފައިދާގެ ގޮތުގައި ލިބިފައިވެއެވެ. އޭގެ ކުރީއަހަރު، 1.97 ބިލިއަން ރުފިޔާގެ ވިޔަފާރިކޮށްގެން އެކުންފުންޏަށް ފައިދާގެ ގޮތުގައި ލިބިފައި ވަނީ، 319.25 މިލިޔަން ރުފިޔާއެވެ. މިގޮތުން 2022 ވަނަ އަހަރަކީ ކުންފުނީގެ ތާރީހުގައި ރިކޯޑްކުރެވިފައިވާ އެންމެ ބޮޑު އާމްދަނީ އަދި ހިންގުމުގެ ފައިދާ ހާސިލުކުރެވުނު އަހަރުކަމުގައިވެސް އެމްޓީސީސީން ވަނީ ބުނެފައެވެ.

އެކުންފުނިން ހާމަކޮށްފައިވާ ގޮތުގައި ރެކޯޑް އަދަދަދެއްގެ ފައިދާއާއިއެކު އެކުންފުނީގެ ޑިރެކްޓަރުންގެ ބޯޑުން ނިންމާފައިވަނީ، މޫނުމަތީ އަގު 5ރގެ ކޮންމެ ހިއްސާއަކަށް 4ރ ގެ މަގުން ޙިއްސާގެ ފައިދާ ބެހުމަށެވެ. 

އެމްޓީސީސީއަކީ ސަރުކާރުގެ ކުންފުނިތަކުގެ ތެރެއިން އެންމެ ގިނަ މަޝްރޫޢުތައް ހިންގައި އަދި އެންމެ ބޮޑު ފައިދާއެއް ނެރެމުން އަންނަ ކުންފުންޏެވެ. ހުސްވިއަހަރު އެކުންފުނިން އަލަށް 65 މަޝްރޫއަކާއި ހަވާލުވި އިރު އެއަހަރު ވަނީ 42 މަޝްރޫއެއްގެ މަސައްކަތް ނިންމާފައެވެ.