އެމަނިކުފާނުގެ ވެރިކަމުގައި ދިވެހިރާއްޖެއަށް ހަމަޖެހުން ގެނެސް ދެއްވާނެ ކަމުގައި އިންތިޚާބީ ރައިސް، ޑރ. މުހައްމަދު މުޢިއްޒު ވިދާޅުވެއްޖެއެވެ. 

އިންތިޚާބުގެ ކާމިޔާބީއާއި ގުޅިގެން އެކުގައި މަސައްކަތް ކުރެއްވި ބޭފުޅުންނާއިއެކު، ރާއްޖޭގެ މީޑިއާތަކާއި ބައްދަލުކުރައްވައި، އިންތިޚާބީ ރައިސް، ޑރ. މުހައްމަދު މުޢިއްޒު ވިދާޅުވީ، ހަމަޖެހުން ގެނެސްދެއްވައި ޤައުމުގެ މިނިވަންކަން ޙިމާޔަތްކުރައްވާނެ ކަމަށެވެ. އަދި އިޤުތިޞާދު ކޮޅަށް ޖައްސަވާނެ ކަމަށާއި، ކުރިއަށް މިއޮތް ދުވަސްތަކަކީ ރައްޔިތުން އުންމީދު ކުރާ ގޮތަށް ގެންދެވޭނެ ދުވަސްތަކެއް ކަމަށާއި އެމަނިކުފާނުގެ ބަހާއި ޢަމަލާ ދިމާވާނެ ކަމަށްވެސް އިންތިޚާބީ ރައީސް ޑރ މުޢިއްޒު ވިދާޅުވިއެވެ.

އެމަނިކުފާނު ވިދާޅުވީ، މިއަދުގެ ނަތީޖާއިން ޤައުމުގެ މުސްތަޤުބަލް ބިނާކުރުމަށް ވަރަށް ބޮޑު ހިއްވަރެއް ލިބިގެން ހިނގައްޖެ ކަމަށެވެ. އަދި އެއީ ޤައުމުގެ މިނިވަންކަން ޔަޤިންކުރުމަށްޓަކައި ލިބުނު ވަރަށް ބޮޑު ހިއްވަރެއް ކަމުގައިވެސް ވިދާޅުވިއެވެ.

މިއަދު ބޭއްވި ރިޔާސީ އިންތިޚާބުގެ ދެވަނަ ބުރު، ޑރ، މުޢިއްޒު ކާމިޔާބު ކުރައްވާފައި ވަނީ، ތަފާތު ބޮޑު ނަތީޖާއަކުންނެވެ. އިންތިޚާބުގައި ވޯޓުލީ މީހުންގެ %54 ވޯޓު އެމަނިކުފާނަށް ލިބިވަޑައިގަތެވެ.