މިއަދު ބޭއްވި ރިޔާސީ އިންތިޚާބުގެ ވޯޓު ނެގުން ނިންމައި، ވޯޓު ގުނުމުގެ މަސައްކަތް ފަށައިފިއެވެ.

ރިޔާސީ އިންތިޚާބުގެ ވޯޓު ނެގުން ކުރިޔަށް ގެންގޮސްފައި ވަނީ މިއަދުގެ ހެނދުނު، 8:00 އިން ފެށިގެން ހަވީރު 5:00އަށެވެ. އަދި ހަވީރު، 5:00 ޖެހި އިރު ގިނަ ފޮށިތަކެއް ވަނީ އިލެކްޝަންސް ކޮމިޝަނުން ކަނޑައަޅާފައިވާ ވަގުތައް ނިންމާފައެވެ.

އިންތިޚާބުގެ ވޯޓުނެގުން ކުރިޔަށް ދިޔައީ އަމާންކަމާއި އޮމާންކަމާއެކުގައެވެ. އެހެން ނަމަވެސް ވޯޓުލާ ސަރަހައްދުން ބޭރުގައި މާރާމާރީތައް ހިންގާފައި ވާއިރު، ގދ. ވާދޫގައި މީހަކު ވޯޓުފޮއްޓަށް ގެއްލުން ދީފައިވެއެވެ.

އިންތިޚާބާއި ބެހޭ ޤާނޫނުގައި ބުނެފައިވާ ގޮތުން، ވޯޓު ގުނަން ފަށާނީ، ވޯޓު ނެގުން ބަންދުކުރާތާ، 30 މިނިޓް ފަހުންނެވެ. 

މިއިންތިޚާބުގައި ވޯޓުނެގުމަށް ރާއްޖެއާ ރާއްޖެއިން ބޭރުގެ ބައެއް ޤައުމުތައް ހިމެނޭ ގޮތުން ޖުމުލަ 586 ވޯޓުފޮއްޓެއް ބަހައްޓާފައެވެ.