ރިޔާސީ އިންތިހާބުގައި ޑރ. މުހައްމަދު މުއިއްޒު ހޮވިވަޑައިގެންފި ނަމަ، ވެރިކަމުގެ ނިޒާމުގެ ތެރޭގައި ޑްރަގުގެ ގޭންގުތައް ހަރަކާތްތެރިވާނެ ކަމަށް، މިއަހަރުގެ އިންތިހާބުގައި އަމިއްލަ ގޮތުން ވާދަ ކުރެއްވި އުމަރު ނަސީރުގެ ރަނިންމޭޓު، މާޒު ސަލީމް ވިދާޅުވެއްޖެ އެވެ. އޭނާ ވަނީ ރިޔާސީ އިންތިހާބުގެ 2 ވަނަ ބުރުގައި ރައީސް އިބްރާހިމް މުހައްމަދު ސާލިހްއާއި ގުޅިވަޑައިގެންފައެވެ. އަދި ރޭ އެމްޑީޕީން ބޭއްވި ކެންޕެއިން ޖަލްސާގައި މާޒް ސަލީމް ބައިވެރިވެވަޑައިގެން ވަނީ ވާހަކަފުޅުވެސް ދައްކަވާފައެވެ. 

ސޯސަން ޖަގަހައިގައި ރޭ ބޭއްވި ޖަލްސާގައި މާޒު ސަލީމް ވިދާޅުވީ އެމްޑީޕީގެ ޕޯޑިއަމަށް އޭނާ ވަޑައިގަތީ ވަޒީފާއެއް، މަގާމަކަށް އެދިގެން ނޫން ކަމަށާއި އަނިޔާވެރިކަމާ ދެކޮޅަށް މަސައްކަތް ކުރަން އެންމެންނަށް މަޖުބޫރުވެފައިވާތީ ކަމަށެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖޭގައި ތިބި ސިޔާސީ ހުރިހާ ވެރިން ޖަލަށްލި ކަމަށާއި ޖަލަށް ލާނެ މީހަކު ނެތިން އެއްބަނޑު ބޭބެ، ވެސް ދަންވަރުގައި ހައްޔަރުކޮށްގެން ޖަލަށް ގެންދިޔަ ކަމަށް ވިދާޅުވިއެވެ.

އުމަރު ނަސީރުގެ ރަނިން މޭޓެއްގެ ގޮތުގައި މިއަހަރުގެ ރިޔާސީ އިންތިހާބުގައި މާޒް ސަލީމް ވާދަކުރެއްވިއިރު އެންމެ ބޮޑަށް އުމަރު ވަކާލާތު ކުރެއްވީ ރާއްޖެއިން ޑްރަގް ގެ ވަބާ ފުހެލުމަށެވެ. މާޒް ސަލީމް ވިދާޅުވީ، މުއިއްޒުއަށް ވެރިކަން ލިބިއްޖެނަމަ ޑްރަގްގެ ގޭންގްތައް ވަކިހިއްޕާލާނެކަމަށެވެ.

"ވެރިކަމުގެ ނިޒާމުގެ ތެރެޔަށް ޑްރަގުގެ ގޭންގުތަކެއް ހޯރަ އަޅަމުން އެބަ އާދޭ. ވެރިކަމުގެ ނިޒާމުގެ ތެރެއަށް ޑްރަގުގެ ގޭންގުތައް އައިސް ފައި ހިއްޕާލާތީ އަޅުގަނޑު މިތަނަށް މިއައީ، އެ ވާހަކަ ތިބޭފުޅުންނާ ހިއްސާކުރަން ވެގެން،" އޭނާ ވިދާޅުވިއެވެ.

ރައީސް ސޯލިހުގެ ސަރުކާރު ދެކެ ބަޔަކު ބިރު ގަންނަނީ ޑްރަގު ބޯޓުތައް ހިފަހައްޓާތީ އާއި ކަނޑުގެ ސަރަހައްދު މޮނިޓާ ކުރާތީ ކަމަށް ސަލީމް ވިދާޅުވިއެވެ. މާޒް ސަލީމް ވިދާޅުވީ ރައީސް ސޯލިހަކީ އަނިޔާވެރިކަމާއި ޑްރަގުގެ ވަބާއިން ރާއްޖެ ސަލާމަތް ކޮށްދެއްވާނެ ލީޑަރު ކަމަށެވެ. އަނިޔާވެރިކަން އިޔާދަކުރަން ބޭނުން ނުވާނަމަ އިންތިހާބުގައި މިސްޓޭކެއް ނުހެދުމަށް އޭނާ ވަނީ އެދިވަޑައިގެންފައެވެ.

ކުރީގެ ރައީސް ޔާމީންގެ ވެރިކަމުގައި ގޭންގުތަކުގެ ނުފޫޒު އޮތް މިންވަރު ހާމަކޮށް ދިނުމުގެ ގޮތުން ސަލީމް ވިދާޅުވީ ކްރިމިނަލް ކޯޓުގެ ފަނޑިޔާރަކަށް ވެސް ގޭންގުތަކުން ބޭނުންވާ މީހަކު ލާން މަސައްކަތް ކުރި ކަމަށެވެ.