ކުޅުދުއްފުށީ ސިޓީގައި އާރް.ޓީ.އެލް ބަހުގެ ޚިދުމަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީއިން ދޭން ފަށައިފިއެވެ.

ކުޅުދުއްފުށި ބަހުގެ ޚިދުމަތް ދިނުމަށްޓަކާ 2 ބަސް ބޭނުންކުރާނެކަމަށް އެމްޓީސީސީއިން ވިދާޅުވެއެވެ. މިއީ މާލޭ ސިޓީގައިވެސް ބޭނުންކުރާފަދަ 22 މީހުންގެ ޖާގައިގެ 2 މިނީ ބަހެވެ.

ބަހުގެ ޚިދުމަތް އެ ސިޓީގައި ފަށްޓަވައިދެއްވީ މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއާއި އެމް.ޓީ.ސީ.ސީގެ ސީއީއޯ އާދަމް އާޒިމެވެ.

ބަހުގެ ޚިދުމަތް ފެށުމާއެކު މިއަދުން ފެށިގެން އެއް ހަފްތާގެ މުއްދަތަކަށް އަޖުމަ ބެލުމުގެ ދަތުރުތައް އެ ސިޓީގައި ކުރާނެއެވެ. އަދި މި ދަތުރުތަކުގައި އާއްމުންގެ އަތުން އެއްވެސް އަގެއް ނުނަގާނެކަމަށް އެމްޓީސީސީއިން ބުނެއެވެ.

އަޖުމަ ބެލުމަށް ހިލޭ ދަތުރުކުރާ މުއްދަތުގެ ތެރޭގައި އާއްމުންގެ ފަރާތުން ލިބޭ ޚިޔާލަށް ބެލުމަށްފަހު ގެންނަންޖެހޭ ބަދަލުތައް ގެންނާނެކަމަށްވެސް އެމްޓީސީސީއިން ވަނީ ބުނެފައެވެ. ކުޅުދުއްފުށީގައި ބަހުގެ ޚިދުމަތް ފެށިގެންދިއުން ވެގެންދާނީ ސްކޫލް ކުދިންނާއި އާއްމު ފަރާތްތަކަށްވެސް ބޮޑެތި ލުއިތަކެއް ލިބިގެންދާނެކަމެއްގެ ގޮތުގައި އެމް.ޓީ.ސީ.ސީއިން ދެކެއެވެ.

އާރްޓީއެލް ބަހުގެ ޚިދުމަތް ކުޅުދުއްފުށީގައި ފަށާފައިވާއިރު، މިމަހުގެ ތެރޭގައި ހއ. ދިއްދޫގައިވެސް އެމް.ޓީ.ސީ.ސީއިން ވަނީ މި ޚިދުމަތް ރަސްމީކޮށް ފަށާފައެވެ.