އުތުރުތިލަފަޅުގައި އޮންނަ އެމްއެންޑީއެފްގެ ސިފަވަރު ބަނދަރަށް ހުއްދަނެތި ވަދެ ވީޑިއޯކޮށް، އަމުރަށް ނުކިޔަމަންތެރިވެ އެރަށަށް އަރަން އުޅުނު މައްސަލަ ފުލުހުންނަށް ހުށައަޅާފައިވާކަމަށް ޤައުމީ ދިފާއީ ބާރުން ވިދާޅުވެއްޖެއެވެ.

އެމްއެންޑީއެފުން އިއްޔެ ވިދާޅުވެފައިވަނީ އުތުރު ތިލަފަޅުގައިވާ އެމްއެންޑީއެފްގެ ސަރަޙައްދަށް "ދިޔަރެސް" ނޫހުގެ ނޫސްވެރިން އަރަން މަސައްކަތްކުރި މައްސަލަ ބަލާ ފިޔަވަޅު އެޅާނެކަމަށެވެ. ދިޔަރެސް ނޫހުން މި ޢަމަލު ހިންގާފައިވަނީ، އުތުރު ތިލަފަޅު ހިއްކާ އެތަނުން ރައްޔިތުންނަށް ގޯތި ދޫކުރާނެކަމަށް ސަރުކާރުން ބުނި ބުނުމާއި ގުޅިގެން، އެތަން ބަލަންކަމަށް ބުނެއެވެ.

އެމްއެންޑީއެފުން ވިދާޅުވީ، އުތުރު ތިލަފަޅުގައި އެމްއެންޑީއެފްގެ ބޭނުންތަކަށް ތަރައްޤީކުރަމުން އަންނަ ސަރަހައްދު ފިޔަވައި އެފަޅުގެ ބާކީ ސަރަޙައްދުތައް ރެސިޑެންޝަލް އޭރިޔާއެއްގެ ގޮތުގައި ކަނޑައަޅުއްވާފައިވާކަމަށް ސަރުކާރުން ހޮނިހިރު ދުވަހުގެ ރޭގެ ވަގުތެއްގައި ހާމަކުރައްވާފައިވަނިކޮށް އިއްޔެގެ ވަގުތެއްގައި ދިޔަރެސް ނޫހުގެ ނޫސްވެރިން ލޯންޗެއްގައިގޮސް ހުއްދަނެތި ސިފައިންގެ ބަނދަރުތެރެއަށް ވަދެ ވީޑިއޯކޮށް ހުއްދަނެތި އެރަށަށް އެރުމަށް މަސައްކަތްކޮށްފައިވާކަމަށެވެ.  

އެކަމާ ގުޅިގެން އެމްއެންޑީއެފުން ނެރުނު ނޫސް ބަޔާނެއްގައި ބުނީ، ސިފައިންގެ މަރުކަޒުތަކަކީ ހުއްދަ ނުހޯދައި ވަނުން މަނާ ތަންތަން ކަމަށެވެ. ބަޔާނުގައި ބުނެފައިވަނީ ހަތަރު މީހުން ލޯންޗެއްގައި ގޮސް ބަނދަރުން ރަށަށް އަރަން އުޅުމުން އެ މީހުން ހުއްޓުވީ އެ ތަނުގެ ސެކިއުރިޓީ ބެލެހެއްޓުމުގައި ހަރަކާތްތެރިވަމުންދިޔަ އެމްއެންޑީއެފްގެ ސާޖަންޓް ފަސްޓް ކްލާސް ރޭންކުގެ ބޭކަލެއް ކަމަށެވެ. އަދި އެކަން ކުރީ އެމްއެންޑީއެފަށް ލިބިގެންވާ ގާނޫނީ ބާރުގެ ދަށުން ކަމަށް ބުންޏެވެ.

އެ ބަނދަރު ބަލަން ހުއްދަށް އެދިގެން އައި މީޑިއާތަކަށް އެ ފުރުސަތު ފަހިކޮށްދީފައި ވާނެ ކަމަށާއި ހުއްދަ ނުހޯދައި އެތަނަށް އަރަން މަސައްކަތް ކުރުމަކީ ގާނޫނާއި ގަވާއިދާ ހިލާފުކަމެއްކަން އެމްއެންޑީއެފުން ވަނީ ފާހަގަކޮށްފަ އެވެ.

އެހެން ގައުމުތަކުގައި ވެސް މިފަދަ އަސްކަރީ މަރުކަޒުތަކަށް ވަންނަން މަސައްކަތްކުރާ މީހުން ހުއްޓުވުމަށް ހަތިޔާރު ވެސް ބޭނުންކުރާ ކަމަށާއި އެހެންވެ މި މައްސަލަ ސީރިއަސް މައްސަލައެއްގެ ގޮތުގައި ބަލައިދިނުމަށް އެމްއެންޑީއެފުން ވަނީ އެދިފަ އެވެ.

"އެމްއެންޑީއެފްގެ މަރުކަޒަކަށް އެމްއެންޑީއެފްގެ ހުއްދަ ނެތި ވަނުމަށް މަސައްކަތްކުރި ކުރުމަކީ ވަރަށް ޒިންމާދާރުކަން ކުޑަ އަދި އެހާމެ ސީރިއަސް މައްސަލެއްކަމުގައި ދެކޭތީ މި ފަރާތްތަކާ މެދު ގާނޫނާއި ގަވައިދުގެ ތެރެއިން ފިޔަވަޅު އަޅައިދެއްވުމަށް އެ މައްސަލަ ކަމާބެހޭ ފަރާތްތަކަށް ހުށަހަޅާނެ ވާހަކަ ދަންނަވަމެވެ،" އެ ބަޔާނުގައި ބުންޏެވެ.

އިދިކޮޅު ފާރާތްތަކުން ތުހުމަތު ކުރަނީ އުތުރު ތިލަފަޅަކީ އިންޑިއާގެ ސިފައިން ބައިތިއްބަން ތަރައްގީކުރާ ތަނެއްގެ ގޮތުގައެވެ. އެ ތުހުމަތު ސަރުކާރުން ތަކުރާރުކޮށް ދޮގުކުރެއެވެ. އެއީ ދިވެހި ސިފައިންގެ ފުރިހަމަ ބާރުގެ ދަށުގައި އޮންނަ ދިވެހިންގެ ތަނެއް ކަމަށް ސަރުކާރުން ދަނީ ބުނަމުންނެވެ.