ރައީސް އަބްދުﷲ ޔާމިން އަބްދުލް ޤައްޔޫމްގެ ވެރިކަމުގައި އޮޑިޓަރ ޖެނެރަލްގެ މަޤާމް އަދާކުރެވި، ނިޔާޒް އިބްރާޙީމަށް ދިޔަރެސްގެ ނޫސްވެރިއަކު މަގުމަތިން ދިމާކޮށް ފުރައްސާރަކޮށްފިކަމަށް އޭނާ ސޯޝަލް މީޑިއާގައި ހާމަކޮށްފިއެވެ. މި ކަން ހިނގާފައިވަނީ މިއަދުގެ ހެނދުނުގެ ވަގުތެއްގައެވެ.

ސޯޝަލް މީޑިއާގައި ފޮޓޯއެއް ހިއްސާކުރުމަށްފަހު، އެ ފޮޓޯގައިވާ 4 މީހުންގެ ތެރެއިން ސީދާވަކިމީހަކު ފާހަގަވާނޭހެން ސިފަކޮށްދިނުމަށްފަހު ނިޔާޒް ބުނެފައިވަނީ، އޭނާ ބޭންކަށް ދިޔަ މަގުމަތީގައި ދިޔަރެސްގެ ނޫސްވެރިޔާވަނީ އޭނާއާއި ދިމާކޮށް ފުރައްސާރަ ކުރުމުގެ އިތުރުން އިންޒާރުވެސް ދީފައިކަމަށެވެ. 

މި ހާދިސާއާ ގުޅިގެން ނިޔާޒް އިތުރަށް ބުނެފައިވަނީ، މިހާރުއްސުރެން އިދިކޮޅު ޕީޕީއެމްގެ އަސްލު ސިފަ ފެންނަން ފަށާފައިވާކަމަށެވެ.

ނަމަވެސް މި މައްސަލަ އަދި ފުލުހުންނަށް ހުށަހެޅިކަމެއް، ނުވަތަ ނޫންކަމެއް ވެސް ނިޔާޒް ހާމައެއް ނުކުރެއެވެ.

އަނެއްކޮޅުން ދިޔަރެސްގެ ނޫސްވެރިޔާ ސޯޝަލް މިޑިއާގައި ބުނަމުންދަނީ އޭނާ އިންޒާރުދީފައި ނުވާނެކަމަށެވެ.

ކަންމިހެން ހިނގިއިރު، މިދިޔަ ހޮނިހިރު ދުވަހު "އަދަދު" ނޫހުން ވަނީ ނިޔާޒް އިބްރާޙިމްގެ އިންޓަވިއުއެއް ވެސް އާންމުކޮށްފައެވެ. އެ އިންޓަވިއުގައި އޭނާ ބުނާ ގޮތުން، 30 ސެޕްޓެމްބަރގައި ރައްޔިތުން ނިކުމެ މި ސަރުކާރު ދަމަހައްޓަން މަސައްކަތްކުރަންޖެހޭ ކަމަށާއި، ޕީޕީއެމްގެ ސަރުކާރެއް ގެންނަން ނުވާނީ އެ ސަރުކާރުގެ އަނިޔާވެރިކަމުން ކަމަށެވެ.