އާދީއްތަ ދުވަހު އޮތް ބަރލިން މެރަތަން ކާމިޔާބުކޮށް، މެރަތަން ދުވުމުގެ ދުނިޔޭގެ ރެކޯޑް އޮންނަ އުމުރުން 38 އަހަރުގެ އެލިއުޑް ކިޕްޗޯގޭ ވެގެން ގޮސްފައި މިވަނީ ބަރލިން މެރަތަން 5 ފަހަރަށް ކާމިޔާބުކުރި ހަމައެކަނި ދުވުންތެރިޔާއަށެވެ. ކެންޔާއަށް ނިސްބަތްވާ ކިޕްޗޯގޭއަށް އޭނާގެ އަތުގައި އޮތް ދުނިޔޭގެ ރެކޯޑް މިފަހަރު އައު ނުކުރެވުނު ނަމަވެސް، މި ރޭސް އޭނާ ނިންމާފައިވަނީ 02:02:49 ނެވެ.

ރޭހުގައި 30 ކިލޯމީޓަރު ފަހަނަ އަޅާ ދިއުމާއި ހަމައަށް ކިޕްޗޯގޭ ދުވަމުން ދިޔަ ސްޕީޑުގައި، އޭނާ އަނެއްކާވެސް ދުނިޔޭގެ މެރަތަން ރެކޯޑް އައު ކޮށްފާނެކަމާއިމެދު އުއްމީދު ކުރެވުނެވެ. ނަމަވެސް ރޭހުގެ 30 ކިލޯމީޓަރާއި ހަމައިން، ކިޕްޗޯގޭއާ އެއްހަމައެއްގައި ދުވަމުން ދިޔަ އިތިއޯޕިއާގެ ޑަރސެހް ކިންޑީގެ ދުވެލި މަޑުވުމުން، ކިޕްޗޯގޭގެ ދުވެލި ވެސް ކުޑަކޮށް މަޑުވެ، ރެކޯޑާއި ހަމަކުރެވޭވަރު ނުވީއެވެ.

ބަރލިން މެރަތަންގައި ކިޕްޗޯގޭ ވަނީ ދެ ފަހަރަށް ދުނިޔޭގެ ރެކޯޑް އައުކޮށްފައެވެ. އެގޮތުން ފުރަތަމަ އައުކުރީ 2018 ވަނަ އަހަރުއެވެ. އެ ފަހަރު އޭނާ ވޯލްޑް ރިކޯޑު އައުކުރީ ކުރީގެ ރެކޯޑަށްވުރެން އެއް މިނެޓަށްވުރެންވެސް ކުރިހޯދުމަށްފަހު 2:02:39 ނެވެ. އަދި މި ރެކޯޑް 2022 ގައި އައުކުރިއިރު، އިތުރު 30 ސިކުންތު ކުރިޔަށްޖެހިލާ، 2:01:09 އަކުން ވަނީ ރޭސް ނިންމާފައެވެ. 

ޖުލްލަ 21 މެރަތަން ދުވެގެން 18 މެރަތަން ކާމިޔާބުކޮށްފައިވާއިރު، ކިޕްޗޯގޭ އަކީ މެރަތަން ދުވުމުގައި ދުނިޔެ ދެކެފައިނުވާ ވަރުގެ ދުވުންތެރިއެކެވެ. އޭނާވަނީ އޮލިންޕިކްސްގައި ވެސް 2 ގޯލްޑް މެޑަލް ހޯދާ، ދުނިޔޭގެ އެންމެ ވާދަވެރި މެރަތަންތައް ވެސް 11 ފަހަރު ކާމިޔާބުކޮށްފައެވެ. 

ކުރިން އެންމެ ގިނަ ބަރލިން މެރަތަން ކާމިޔާބު ކުރުމުގެ ރެކޯޑް އޮތީ އިތިއޯޕިއާގެ ހެއިލް ގެބްސެލަސީ އަތުގައެވެ. އޭނާވަނީ ބަރލިން މެރަތަން ޖެހިގެހިގެން 4 ފަހަރު ކާމިޔާބުކޮށްފައެވެ، އެއީ 2006 – 2009 އަށެވެ.