Advertisement
ޝެއިޙް އިލްޔާސް ޙުސެއިން --- ފޮޓޯ: ސޯޝަލް މީޑިއާ
ޝެއިޙް އިލްޔާސް ޙުސެއިންގެ އާދޭސް!
ރިޔާސީ އިންތިހާބުގެ ދެވަނަ ބުރުގެ ވޯޓުލުމަށް ކުޑަތަންވެފައިވާއިރު، ރާއްޖޭގެ މަޝްހޫރު ދީނީ އިލްމުވެރިޔާ އައްޝައިޙް އިލްޔާސް ޙުސެއިންގެ ޙާއްސަ މެސެޖެއް އަދާލަތު ޕާޓީން އާންމުކޮށްފިއެވެ.
މި މެސެޖުގައި ޝެއިޙް އިލްޔާސް އެންމެ ފުރަތަމަ ވެސް ނަސޭހަތްތެރިވެފައިވަނީ މާޒީއިން އިބުރަތް ހާސިލުކުރުމަށެވެ. އަދި މާޒީގެ ތެރެއަށް ފުންކޮށް ވިސްނައިލާއިރު ފެންނަންއޮތީ އަނިޔާވެރިކަމުގެ ހައްދުފަހަނަ އަޅާފައިވާ ދުވަސްތަކެއް ކަމަށާއި، ކުރިއަށް މި އޮތް އިންތިހާބުގައި އެއްފަރާތުން މި ތަމްސީލުކުރަނީ ބިރުވެރިކަން ކަމަށް ޝެއިޙް ފާހަގަ ކުރެއްވިއެވެ.
ޝެއިޙް އިލްޔާސް އިތުރަށް ފާހަގަކުރެއްވި ގޮތުގައި މާޒީގައި ދެން ފެނިގެން ގޮސްފައިވަނީ ގަސްދުގައި ރާވައިގެން ވިޔަފާރިތައް ބަނގުރޫޓުކޮށްލުމާއި ހަމައެއް ސަބަބެއް ނެތި މީހުން ވަޒީފާއިން ވަކިކުރުން އާންމުވި ނާމާން ބިރުވެރި ދުވަސްތަކެއްކަމަށެވެ. އަދި އެއީ ސަލާމަތީ ޚިދުމަތްތައް ސިޔާސީ ބޭނުމަށް ހަލަބޮލިކޮށް އެތަންތާނުގެ ނިޒާމު ގެއްލުވާލާ އެ މުއައްސަސާތަކާއި އެ މުއައްސަސާތަކަށް ނިސްބަތްވާ އެތައް ބައެއްގެ ގަދަރާއި ޝަރަފާއި ކަރާމާތް ނަގާލި ހިތި ދައުރެއް ކަމަށެވެ. މީގެ އިތުރުން ގައުމުގެ ދިފާޢަށް އެއްކޮށްފަ ހުންނަ ހަތިޔާރުވެސް ނުބެލެހެއްޓި ސިފައިންނާ ފުލުހުންގެ އިތުރަށް ފަނޑިޔާރުގެތަކާއި މިނިވަން މުއައްސަސާތަކަށްވެސް ހިތުހުރިގޮތެއް ހަދާލާ ދައުލަތުގެ ނިޒާމު މުޅިން ރޫޅާލި އަނިޔާވެރި ދުވަސްތަކެއް ގޮތަށް ޝެއިޙް ސިފަ ކުރެއްވިއެވެ.
ރައީސް އިބްރާޙިމް މުޙައްމަދު ޞާލިޙްގެ މި ވެރިކަމަށް އިޝާރާތް ކުރައްވައި ޝެއިޙް އިލްޔާސް ވިދާޅުވީ ހިތްއެދޭ ހުރިހާކަމެއް ފުރިހަމަ ނުވިނަމަވެސް ވޭތުވެ ދިޔަ ފަސްއަހަރު އޭގެ ކުރީ އަހަރުތަކާ އަޅާބަލާއިރު ގައުމަށް ސުލްހަމަސަލަސްކަމާ ހަމަޖެހުން އައި ކަމަށެވެ.
މި ހުރިހާ ކަމަކަށް ރިޢާޔަތްކޮށް، ޝެއިޙްގެ އިންޓަވިއު ނިންމާލައްވަމުން އެންމެހާ ދިވެހި ލޮބުވެތި ރައްޔިތުންގެ ކިބައިން އެދުނީ މާޒީގެ އަނިޔާވެރިކަމަށް އެނބުރި ނުދިއުމަށެވެ.
"އަޅުގަނޑު އެންމެހާ ދިވެހި ލޮބުވެތި އަޚުންނާ އުޚުތުންގެ ކިބައިން އާދޭހާއެކު މި އެދޭ އެދުމަކީ ކުރީގެ މާޒީގެ އަނިޔާވެރި ބިރުވެރި ދުވަސްތައް އަލުން އިއާދަވާނެ ނިންމުމެއް މި ރިޔާސީ އިންތިޚާބުގައި ނުނިންމެވުން. އަދި ގޭގައި މަޑުނުކުރައްވާ ނިކުމެވަޑައިގެން ކުރީގެ ބިރުވެރި އަނިޔާވެރިކަން އަޔަނުދީ ސުލްހަމަސަލަސްކަން ދެމެހެއްޓުމަށްޓަކައި ރައީސް އިބުރާހިމް މުހައްމަދު ސާލިހަށް ވޯޓުދެއްވުން."
