މޯލްޑިވިއަންގެ ފްލީޓަށް އޭޓީއާރު މަރުކާގެ 2 ބޯޓު ގަންނަން އޭޓީއާރު ކުންފުންޏާއެކު އެއްބަސްވެއްޖެއެވެ. އޭޓީއާރު ކުންފުންޏާއެކު މޯލްޑިވިއަނުން އެއްބަސްވެފައިވަނީ އޭޓީއާރު 600-72ގެ 2 ބޯޓު ގަތުމަށެވެ. މިއީ އެ އެއަރލައިނުގެ ފްލީޓުގައި ބޭނުންކުރާ ޑޭޝް8 މަރުކާގެ ބޯޓުތަކުގެ ބަދަލުގައި ބޭނުން ކުރާން ގެންނަ ބޯޓުތަކެކެވެ.

ރާއްޖޭގެ އެތެރޭގެ އުދުހުންތަކުގެ ފެންވަރު ރަނގަޅުކޮށް ވައިގެ ދަތުރުފަތުރުން ރަށްތައް ގުޅާލުމަށް ކުރާ މަސައްކަތަށް އަލަށް މި ގެންނަ ބޯޓުތަކާއެކު ބޮޑު ކުރިއެރުމެއް އަންނާނެ ކަމަށްވެސް މޯލްޑިވިއަނުން ވަނީ ބުނެފައެވެ.

މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިން ޑިރެކްޓަރު މުހައްމަދު މިހާދު ވިދާޅުވީ، އެ ކުންފުނީގެ ޚިދުމަތުގައި އޭޓީއާރުގެ ބޯޓުތައް ބޭނުންކުރަން ފެށުމުން ކަސްޓަމަރުންގެ ފަރާތުން ވަރަށް ރަނގަޅު ފީޑްބެކް ލިބެމުން އަންނަކަމަށެވެ. އަދި މިއީ ޚަރަދު ކުޑަ، ތިމާވެއްޓާ ރައްޓެހި އުޅަނދުތަކެއް ކަމަށްވެސް މިހާދު ވަނީ ފާހަގަކޮށްފައެވެ.

އޭޓީއާރު ކުންފުނީގެ ޗީފް އެގްޒެކެޓިވް އޮފިސަރު ނަތާލީ ޓާނައުޑް ވިދާޅުވީ، މޯލްޑިވިއަންގެ ފްލީޓު ޒަމާނީކޮށް، ތިމާވެއްޓާ ރައްޓެހި، ޚަރަދު ކުޑަ ބޯޓުތަކަކަށް ބަދަލު ކުރާއިރު އޭޓީއާރު މަރުކާގެ ބޯޓުތައް ހިޔާރުކުރުމަކީ ލިބިގެންދިޔަ ވަރަށް ބޮޑު އުފަލެއްކަމަށެވެ.

މޯލްޑިވިއަންގެ ފްލީޓުގައި އޭޓީއާރު މަރުކާގެ 3 ބޯޓު މިހާރު އޮވެއެވެ. އެއީ އޭޓީއާރު 600-72ގެ ދެ ބޯޓު އަދި އޭޓީއާރު 42-600ގެ އެއް ބޯޓެވެ. މޯލްޑިވިއަންގެ ފްލީޓް އައުކޮށް އައު ބޯޓުތައް ހޯދުމުގެ މަސައްކަތް އެ ކުންފުނިން ވަނީ މިހާރު ފަށާފައެވެ.