މިއަހަރުގެ ފުރަތަމަ ހަތަރުމަސް ދުވަސް ނިމުނުއިރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 7 ލައްކައިން މަތިވެ ފަތުރުވެރިކަމުގެ އައު ރެކޯޑެއް ޤާއިމްކޮށްފިއެވެ.

ތަފާސް ހިސާބުތަކުން ދައްކާގޮތުގައި މިއަހަރުގެ މެއި މަހުގެ 5 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރި، އަދަދު ވަނީ 710645އަށް އަރާފައެވެ. އެއީ ހުސްވިއަހަރާއި އަޅާ ބަލާއިރު %17.5 އިތުރުއަދަދެކެވެ. އަދި ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި 2019 ވަނަ އަހަރުގެ މިމުއްދަތުގައި ރާއްޖެއަށް ޒިޔާރަތްކުރި ފަތުރުވެރިންނަށްވުރެ މިއަހަރު ޒިޔާރަތްކުރި ފަތުރުވެރިންގެ އަދަދު އިތުރެވެ.

މިއަހަރު ރާއްޖެއަށް އެންމެ ގިނަ ފަތުރުވެރިން އައިސްފައި ވަނީ، ރަޝިޔާއިންނާއި އިންޑިއާއިންނާއި ވިލާތުގެ ތިންޤައުމަކުންނެވެ. ފާއިތުވި ހަތަރު މަސްދުވަހުގެ ތެރޭގައި ރަޝިޔާއިން އެކަނިވެސް ރާއްޖެއަށް ލައްކައަކާއި ގާތްކުރާ އަދަދަށް ވަނީ ފަތުރުވެރިން އައިސްފައެވެ.

ކޯވިޑް-19އަށް ފަހު ރާއްޖޭގެ ފަތުރުވެރިކަން ބާރަށް ކުރިއަރަމުން އަންނަ އިރު އެއާޕޯޓުގެ ތަރައްޤީއަށް ހިންގޭ މަޝްރޫޢުތަކާއި، އިތުރުވަމުން އަންނަ އެނދުތަކާއިއެކު ރާއްޖެއަށް އަންނަ ފަތުރުވެރިންގެ އަދަދު މަހުން މަހަށް އިތުރުވަމުންނެވެ.