ޕާކިސްތާނުގެ ކުރީގެ ބޮޑުވަޒީރު އިމްރާންޚާން ހައްޔަރު ކުރުމާއި ގުޅިގެން، ހިނގަމުންދާ ހަމަނުޖެހުންތަކުގައި، 5 މީހުން މަރުވެއްޖެއެވެ.

ޕާކިސްތާނުގެ މީޑިއާތަކުން ހާމަކޮށްފައިވާ ގޮތުގައި 5 މީހުންވެސް މަރުވީ، އިސްލާމް އާބާދުގައި ހުންނަ ސިފަންގެ މަރުކަޒެއްގެ ކުރިމަތީގައި އާއްމުންނާއި ސިފަންނާއި ދެމެދު ހިނގަމުންދިޔަ މުޒާހަރާގެ ތެރެއިންނެވެ. ސިފައިން އާއްމުންގެ ތެރެއަށް ބަޑިޖެހުމުން އެކަކު ވަގުތުން މަރުވި އިރު އިތުރު 4 މީހުން މަރުވީ، ހޮސްޕިޓަލަށް ގެންދިޔަ ފަހުންނެވެ.

މުޒާހަރާގެ ބައިވެރިންގެ ތެރެއަށް ސިފައިން ކެނޑިނޭޅި ބަޑިޖަމުން ދިޔަ ކަމުގައި މަންޒަރުދުށް ފަރާތްތަކާއި ހަވާލަދީ މީޑިއާތަކުން ރިޕޯޓްކޮށްފައި ވެއެވެ.

އިމްރާން ޚާން ހައްޔަރުކުރުމާއި ގުޅިގެން ވެރިރަށް އިސްލާމް އާބާދުގެ އިތުރުން، ލާހޯރު، ކަރާޗީ، ޕިޝާވަރު އަދި ރާވަލްޕިންޑީގައި ދަނީ ވަރުގަދަޔަށް މުޒާހަރާކޮށް ހަމަނުޖެހުންތައް ހިންގަމުންނެވެ. މިގޮތުން ސިފައިންގެ މަރުކަޒުތަކަށް އާއްމުން ވަދެގެންފައި ވާއިރު، ސިފައިންގެ މަރުކަޒުތަކާއި ވެހިކަލްތަކުގައި ރޯކޮށްލައި އާއްމުންދަނީ ހަމަނުޖެހުންތައް ހިންގަމުންނެވެ. މިހަމަ ނުޖެހުންތަކާއި ގުޅިގެން ޕާކިސްތާނުގެ ހާލަތު ދަނީ ގޯހުން ގޯހަށް ބަދަލުވަމުން ކަމުގައި، ބައިނަލްއަޤުވާމީ މީޑިއާތަކުންވެސް ވަނީ ރިޕޯޓްކޮށްފައެވެ.

އިމްރާންޚާންގެ ޕާޓީ ޕާކިސްތާން ތަޚްރީކޭ އިންސާފް ޕާޓީން ހާމަކޮށްފައިވާ ގޮތުގައި، ޕެރަމިލިޓަރީ ފުލުހުން އިމްރާންޚާން ހައްޔަރުކުރީ އިސްލާމް އާބާދުގެ ކޯޓުގައި ހުއްޓައެވެ. އަދި ޕެރަމިލިޓަރީ ފުލުހުން ކޯޓުތެރެއަށް ވަދެ އިމްރާން ޚާން ގެންދިޔައީ، އެއްވެސް ޤާނޫނީ އުސޫލަކުން ނޫންކަމަށާއި، އެހައްޔަރު ކުރުމަކީ، އިމްރާންޚާން ވަގަށް ނެގުންކަންވެސް ޕާޓީން ވަނީ ސިފަކޮށްފައެވެ.

މިއަދު މެންދުރު ފަހު އިމްރާންޚާން ހައްޔަރުކުރި އިރު އެމަނިކުފާނު ހައްޔަރުކޮށްފައި ހުރި ތަނެއް ނޭނގެއެވެ.