ރިޔާސީ އިންތިޚާބުގައި އާދަޔާ ޚިލާފު ބޮޑު ނާކާމިޔާބީއަކާއި ކުރިމަތިލާން ޖެހުނުު، ޖުމްހޫރީ ޕާޓީންް ރިޔާސީ އިންތިޚާބުގެ ދެވަނަބުރަށް ކޯލިޝަން ހެދުމާއި ގުޅޭ ގޮތުން ނިންމާގޮތެއް ވަރަށް އަވަހަށް ޢިއުލާނު ކުރާނޭ ކަމުގައި އެޕާޓީން ބުނެފިއެވެ.

ރިޔާސީ އިންތިޚާބުގައި ޖުމުހޫރީ ޕާޓީއަށް ލިބުނު އާދަޔާ ޚިލާފު ބޮޑު ނާކާމިޔާބީއަށްފަހު، އެޕާޓީން މިއަދު ނެރުނު ނޫސްބަޔާނުގައި ބުނެފައި ވަނީ، ވަގުތު ޤައުމުގެ މަޞްލަޙަތަށްޓަކައި އިންތިޚާބުގެ ދެވަނަ ބުރާ ދޭތެރޭ ޖުމްހޫރީ ޕާޓީން ނިންމާ ގޮތެއް ޕާޓީގެ ކައުންސިލްގައި މަޝްވަރާކުރުމަށްފަހު، ވަރަށް އަވަހަށް އިޢްލާން ކުރާނޭކަމަށެވެ. ކޯލިޝަން ހެދުމާއި ގުޅޭ ގޮތުން ޖުމްހޫރީ ޕާޓީން ވާހަކަ ދެއްކި ނަމަވެސް، ޕީއެންސީން ޖުމްހޫރީ ޕާޓީއާ އެކު ކޯލިޝަން ނުހެދުމަށް ރައީސް ޔާމީނު އަންގަވާފައިވާ ކަމުުގެ އަޑުތައް ވަނީ ފެތުރިފައެވެ.

2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި، ޖުމްހޫރީޕާޓީގެ ކެންޑިޑޭޓް ޤާސިމް އިބްރާހީމަށް ފަންސާސްހާހަށް ވުރެ ގިނަ ވޯޓުލިބުނެވެ. އެހެން ނަމަވެސް މިއަހަރުގެ ރިޔާސީ އިންތިޚާބުގެ ފުރަތަމަ ބުރުގައި ޤާސިމަށް ލިބުނީ، އެންމެ 5460 ވޯޓެވެ.