ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި، އެމަނިކުފާނުގެ ކޮއްކޯފުޅު އަދި މަޖިލީހުގެ ނައިބު ރައީސް އީވާ ޢަބުދުﷲ ގެ އިތުބާރު ނެތްކަމަށް 50 ވުރެ ގިނަ މެމްބަރުން ސޮއެކޮށް ހުށައެޅި މައްސަލަ އަނބުރާ ނަގައިފިއެވެ.

އެމްޑީޕީގެ ޕާލަމެންޓްރީ ގުރޫޕްގެ މެމްބަރު އަދި އެމްޑީޕީގެ ރިޔާސީ ކެންޑިޑޭޓްގެ ރަނިންމޭޓް މުޙައްމަދު އަސްލަމް ވިދާޅުވީ، މައްސަލަ އަނބުރާ ނެގުމަށް އެމްޑީޕީން ނިންމީ ކަންކަން އަމާންކޮށް ގެންދިޔުމަށްޓަކައި ކަމަށެވެ.

އެމްޑީޕީގެ ރިޔާސީ ޕްރައިމަރީގައި ކުރިމަތިވެވަޑައިގެންނެވި ނާކާމިޔާބީއާއެކު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރު ވައްޓާލުމަށް ރައީސް ނަޝީދު ގެންދެވީ ފާޅުގައި މަސައްކަތް ކުރައްވަމުންނެވެ. ރައީސް ނަޝީދުގެ އިތުބާރު ނެތްކަމުގެ މައްސަލައިގައި 50 މެމްބަރުން ސޮއެކުރެއްވިއެވެ. އަދި އީވާގެ އިތުބާރު ނެތްކަމުގެ މައްސަލައިގައި، 54 މެމްބަރުން ސޮއެކުރެއްވިއެވެ.

ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞާލިޙަށް ކާމިޔާބު ވިޔަ ނުދިނުމަށް، ރައީސް ނަޝީދު އިސްވެ ހުރެ، ދަ ޑިމޮކްރެޓްސްގެ ނަމުގައި، ސިޔާސީ ޕާޓީއެއް އުފައްދަވައި، އެޕާޓީގެ ފަރާތުން ރިޔާސީ ކެންޑިޑޭޓަކަށް އިލްޔާސް ލަބީބު ނެރެ، އެމްޑީޕީގެ ވޯޓުތައް ބައިބައިކޮށްލެއްވިއެވެ.

ރިޔާސީ އިންތިޚާބުގެ ފުރަތަމަ ބުރުގައި އިދިކޮޅު ކެންޑިޑޭޓް ރައީސް ޞާލިޙްގެ މައްޗަށް ވަނީ، %17 ގެ ތަފާތަކުން ކުރި ހޯއްދަވާފައެވެ.