ގއ. ކޮނޑޭ ޔޫތު ސެންޓަރު ތަރައްޤީކުރުމުގެ މަސައްކަތް ބަޔަކާ ޙަވާލުކުރައްވައިފިއެވެ. ޔޫތު މިނިސްޓްރީން މި މަސައްކަތް ހަވާލުކޮށްފައިވަނީ ލައިކަންސް އިންވެސްޓްމަންޓާއެވެ.

މި މަސައްކަތުގެ އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އަޙްމަދު މުޙައްމަދެވެ. އަދި ލައިކަންސް އިންވެސްޓްމަންޓުގެ ފަރާތުން ސޮއިކުރެއްވީ އެ ކުންފުނީގެ ވެރިޔާ އަބްދުﷲ ކަލީމެވެ.

ކޮނޑޭ ޔޫތު ސެންޓަރު ތަރައްޤީކުރުމުގެ މަސައްކަތް ޙަވާލުކުރައްވާފަވަނީ މަސައްކަތް ފަށާތާ 125 ދުވަހުގެ ތެރޭގައި ނިންމާ ގޮތަށެވެ. މި މަޝްރޫޢަކީ ސަރުކާރުގެ ބަޖެޓުން ހަތަރު މިލިޔަން އެއްލައްކަ ތޭރަހާސް ހަސަތޭކަ ތިރީސް ފަސް ރުފިޔާ ތިރީސް ތިން ލާރި ޚަރަދުކޮށްގެން ކުރިޔަށް ގެންދާ މަޝްރޫޢެކެވެ.  

ރާއްޖޭގެ ހުރިހައި ރަށެއްގައިވެސް ޒުވާނުންނާއި އެކި އުމުރުފުރާގެ މީހުންނަށް ފަސޭހައިން ކުޅިވަރު ކުޅެވޭނެ އިންތިޒާމްތައް ހަމަޖެއްސެވުމަށް މި ސަރުކާރުން ދަނީ ގިނަ މަޝަރޫއުތަކެއް ކުރިއަށްގެންދަމުންނެވެ.