ސިވިލް ކޯޓުގެ އިސްޤާޟީ އަދި ކްރިމިނަލް ކޯޓުގެ އިސްޤާޟީ ކަމަށް ދެ ޤާޟީއަކު އައްޔަނުކުރައްވައިފިއެވެ.

ޖުޑީޝަލް ސާރވިސް ކޮމިޝަނުން ހާމަކުރައްވާފައިވާ ގޮތުގައި، ކްރިމިނަލް ކޯޓުގެ އިސްޤާޟީގެ މަޤާމަށް ހަމަޖައްސަވާފައި ވަނީ މިހާތަނަށް އެކޯޓު ވަގުތީ ގޮތުން ހިންގެވުމާއި ހަވާލުވެ ހުންނެވި، ޅ.ހިންނަވަރު، މާތިލަ، އަލްއުސްތާޛު އާދަމް މުޙައްމަދެވެ. އަދި ސިވިލްކޯޓުގެ އިސްޤާޟީގެ މަޤާމަށް ހަމަޖައްސަވާފައި ވަނީ މިހާތަނަށް އެކޯޓު ވަގުތީ ގޮތުން ހިންގެވުމާއި ހަވާލުވެ ހުންނެވި، ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދެވެ.

ޖޭއެސްސީން ހާމަކުރައްވާފައިވާ ގޮތުގައި މިދެބޭފުޅުން އެކޯޓުތަކުގެ އިސްޤާޟީންގެ މަޤާމަށް ހަމަޖައްސަވާފައި ވަނީ، އެކަމަށް ކުރިމަތިލުމަށް ކޮމިޝަނުން ކޮށްފައިވާ 02 އިޢުލާންގެ ދަށުން މި ދެ މަޤާމަށް ކުރިމަތިލީ ފަރާތްތަކާ "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ"އިން އިންޓަރވިއުކުރުމަށްފަހުގައެވެ.

އިސްޤާޟީ ކަމަށް މި ދެބޭފުޅުން ހަމަޖެއްސުމަށް 2023 މޭ 03 ވަނަ ދުވަހު ބޭއްވުނު މި ކޮމިޝަންގެ ބައްދަލުވުމުގައި ނިންމާ، 2023 މޭ 09 ވަނަ ދުވަހު ވަނީ މަޤާމުގެ ލިޔުންދެއްވާފައި ކަމަށްވެސް ޖޭއެސްސީން ހާމަކުރައްވާފައިވެއެވެ.