އުތުރުގެ 20 ރަށެއްގައި ކުނި މެނޭޖްކުރާ މަރުކަޒު ޤާއިމުކުރުމަށް ޕްލޭނިންގ މިނިސްޓްރީން އަމިއްލަ ކުންފުންޏަކާއި ހަވާލުކޮށްފިއެވެ. މި މަސައްކަތް ހަވާލުކޮށްފައިވަނީ އަޒްރޯވާ މޯލްޑިވްސް ޕްރައިވެޓް ލިމިޓެޑާއެވެ.

މި 3 ޒޯނުގައިވެސް ހިމެނޭ ރަށްތަކުގައި ކުނި މެނޭޖްކުރާ މަރުކަޒުތައް ޤާއިމުކުރުމަށް އަޒްރޯވާ މޯލްޑިވްސްއާއި ޙަވާލުކޮށްފައިވަނީ 8 މަސް ދުވަހުގެ ތެރޭގައި މަސައްކަތް އެއްކޮށް ނިންމާގޮތަށެވެ.

މި މަޝްރޫޢު ޙަވާލުކުރުމުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. އަދި އަޒްރޯވާ މޯލްޑިވްސްގެ ފަރާތުން ސޮއިކުރެއްވީ އެކުންފުނީގެ ޕްރޮޖެކްޓް މެނޭޖަރ ހެވާގޭ މަހެންދުރަ މަދުސަނަކް ކަރުނަރަތަނޭއެވެ.

މި މަޝްރޫޢަކީ އޮޕެކް ފަންޑް ފޯރ އިންޓަރނޭޝަނަލް ޑިވެލޮޕްމަންޓް، އޮފިޑް ލޯން އެހީގެ އަދި ދިވެހި ސަރުކާރުގެ ބަޖެޓުން ޚަރަދުކޮށްގެން ހިންގާ މަޝްރޫޢެކެވެ. 20 ރަށުގެ ކުނި މެނޭޖްކުރާ މަރުކަޒު ޤާއިމުކުރުމުގެ މަޝްރޫޢަށް ޖުމްލަ 107 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިން މިނިސްޓްރީން ވަނީ ވިދާޅުވެފައެވެ.

މި މަޝްރޫޢު ކުރިއަށްގެންދިއުމަށް ހަމަޖެހިފައިވަނީ ހއ، ހދ، އަދި ށ އަތޮޅުގެ ރަށްތަކަށް ޖުމްލަ 3 ޒޯނަކަށް ބަހާލައިގެންނެވެ.

ޒޯން1 ގައި މަޝްރޫއު ކުރިއަށްގެންދާ ރަށްރައް:

ހއ. މާރަންދޫ، ހއ. ތަކަންދޫ، ހއ. އުލިގަމު، ހއ. މުރައިދޫ، ހއ. މޮޅަދޫ، ހއ. ދިއްދޫ

ޒޯން2

ހދ. ނޮޅިވަރަން، ހދ. ކުމުންދޫ، ހދ. ވައިކަރަދޫ، ހދ. މަކުނުދޫ، ހދ. ފިނޭ، ހދ. ހިރިމަރަދޫ، ހދ. ކުރިނބީ، އަދި ހދ. ނޭކުރެންދޫ

ޒޯން3

ށ. ބިލެތްފަހި، ށ. ފީވައް، ށ. ފޭދޫ، ށ. ކަނޑިތީމު، ށ. ޅައިމަގު އަދި ށ. ނޫމަރާ