ހޯރަފުށި ހޮސްޕިޓަލްގެ ޢަމަލީ މަސައްކަތް ފަށައިފިއެވެ. ރޭ ހޯރަފުށީގައި ބޭއްވި ޚާއްސަ ރަސްމިއްޔާތެއްގައި، ހޮސްޕިޓަލްގެ ބިންގާ އަޅުއްވައިދެއްވީ ހެލްތު މިނިސްޓަރ އަޙުމަދު ނަސީމްއާއި ހޯރަފުށީ ދާއިރާގެ މެންބަރު އަޙުމަދު ސަލީމާއި ހޯރަފުށި ކައުންސިލގެ ރައީސް މުޙައްމަދު ވަހީދުއެވެ.

އަތޮޅުތަކުގައި އާބާދީ ބޮޑެތި ރަށްތަކުގެ ސިއްޙީ މަރުކަޒުތައް ހޮސްޕިޓަލްތަކުގެ ގޮތުގައި ތަރައްޤީކުރެއްވުމަށް ސަރުކާރުން ފައްޓަވާފައިވާ މަސައްކަތުގައި 34 ރަށެއް ހިމެނެއެވެ.އެގޮތުން ހޯރަފުށީ ހޮސްޕިޓަލަކީ މަސައްކަތް ފެށި ދެވަނަ ހޮސްޕިޓަލެވެ. މަސައްކަތް ހަވާލުކުރިތާ 15 ދުވަހުގެ ތެރޭގައި ހޯރަފުށި ހޮސްޕިޓަލުގެ އަމަލީ މަސައްކަތް މިވަނީ ފަށާފައެވެ.

މި މަސައްކަތް ފައްޓަވައިދެއްވާ ވާހަކަދައްކަވަމުން ހެލްތު މިނިސްޓަރ އަޙުމަދު ނަސީމް ވިދާޅުވީ، ހޯރަފުށީގައި ތަރައްޤީކުރާ ހޮސްޕިޓަލަކީ 30 އެނދުގެ ހޮސްޕިޓަލެއްކަމަށެވެ. މިނިސްޓަރ ވިދާޅުވީ ހޮސްޕިޓަލްތައް ތަރައްޤީކުރަނީ، ކޯވިޑްގެ ތަޖުރިބާއަށް ބެލުމަށްފަހު އެފަދަ ޙާލަތްތަކުގައި ފަރުވާ ދެވޭނެ ފެންވަރަށް ކަމަށެވެ.

ހޯރަފުށި ކައުންސިލްގެ ރައީސް މުޙައްމަދު ވަހީދު ވިދާޅުވީ ސިއްޙީ ޚިދުމަތް ހޯދުމުގައި ހޯރަފުށީގެ ރައްޔިތުން ވަރަށް ބޮޑު ތަކުލީފެއް އުފުލާފައިވާކަމަށެވެ. އެކްސްރޭއެއް ނަގަން ނޫނީ ލޭއެޅުމުގެ ޚިދުމަތެއް ހޯދަންވިއަސް ދާންޖެހެނީ ރަށުން ބޭރަށްކަމަށެވެ. 

ހޯރަފުށި ހޮސްޕިޓަލުގައި ގިނަ ހިދުމަތްތަކެއް ލިބޭނެ އިންތިޒާމް ހަމަޖައްސަވާނެކަމަށް ހެލްތް މިނިސްޓްރީން ވިދާޅުވެއެވެ. އޭގެތެރޭގައި އެކްސްރޭގެ ޚިދުމަތާއި، އިންފެކްޝަސް ޑިސީޒް ކޮންޓްރޯލް ޔުނިޓަކާއި، ފްލޫ ކްލިނިކަކާއި ފުލްފްލެޖް އިމަރޖެންސީ ރޫމެއްވެސް ހިމެނެއެވެ.

ހޯރަފުށީ ހޮސްޕިޓަލް ތަރައްޤީކުރުމުގެ ޢަމަލީ މަސައްކަތް ކޮންޓްރެކްޓަރާއި ހަވާލުކުރައްވާފައިވަނީ މިދިޔަ އޮގަސްޓްމަހުގެ 19ވަނަ ދުވަހުއެވެ. ހެލްތު މިނިސްޓްރީގެ ފަރާތުން މިމަސައްކަތް ހަވާލުކުރައްވާފައިވަނީ، ޕީޓީ ސިޓްރަމަސް ހެވީ އިންޑަސްޓްރީސްއިން ޖޮއިންޓް ވެންޗަރ ވިތު ފްލެކްސިން ޕްރައިވެޓް ލިމިޓެޑްއާއެވެ. މަސައްކަތް ހަވާލުކޮށްފައިވަނީ 1 އަހަރާއި 6މަސް ދުވަހުން ނިންމާގޮތަށް، 85.7 މިލިއަން ރުފިޔާއަށެވެ.