ދިވެހިރާއްޖޭގެ ޚާރިޖީ ދާއިރާގައި 37 އަހަރަށްވުރެ ގިނަދުވަހު ޚިދުމަތް ކުރެއްވި، މ. އެންދެރިމާގޭ އާބިދާ އަޙްމަދު ނެތްކަމުގެ އިޙްސާސް އަބަދުވެސް ކުރެއްވޭނެ ކަމުގައި ޚާރިޖީ ވަޒީރު ޢަބުދުﷲ ޝާހިދު ވިދާޅުވެއްޖެއެވެ.

މިނިސްޓަރ ޝާހިދު މިހެން ވިދާޅުވީ، ޢާބިދާ އަޙްމަދު ނިޔާވުމުގެ ހިތާމައިގައި ފޮނުއްވި ތަޢުޒިޔާގައެވެ.

އުމުރުފުޅުން 66 އަހަރުފުޅުގައި ޢާބިދާ އަޙްމަދު ނިޔާވީ، މިއަދު މާލޭގައެވެ. ޖަނާޒާ އޮތީ، މިއަދުގެ ޢަޞުރު ނަމާދަށްފަހު، މަސްޖިދުއްތަޢާވުން އާސަހަރާ މިސްކިތުގައެވެ.

މިނިސްޓަރ ޝާހިދު ވިދާޅުވީ، އާބިދާ އަހްމަދަކީ ޚާރިޖީ ޓީމުގެ އެއް ތަނބުކަމަށެވެ. އަދި ވަފާތެރިކަމާއި، ލޯތްބާއި، ޝައުގުވެރިކަމާއެކު 40 އަހަރަށްވުރެ ގިނަ ދުވަހު މިނިސްޓްރީއަށް ޚިދުމަތްކުރައްވާފައިވާ އާބިދާއަކީ އެންމެންގެ އެކުވެރިއެއްކަމުގައިވެސް މިނިސްޓަރ ޝާހިދު ވިދާޅުވިއެވެ.

އަލްފާޟިލް ޢާބިދާ އަހުމަދު ދައުލަތަށް ޚިދުމަތް ކުރައްވަން ފެއްޓެވީ އުމުރުން 16 އަހަރުގައެވެ. އެންމެ ގިނަ ދުވަހު ޚިދުމަތް ކުރެއްވީ ޚާރިޖީ ދާއިރާގައެވެ. މިގޮތުން 1985 އިންް ފެށިގެން 37 އަހަރަށް ވުރެ ގިނަ ދުވަހު އެމިނިސްޓްރީގައި ޚިދުމަތް ކުރައްވާފައިވެއެވެ.