ކުޅުދުއްފުށީ ރީޖަނަލް ހޮސްޕިޓަލްގައި ބްލަޑް ބޭންކެއް ޤާއިމުކޮށްފިއެވެ. ސަރުކާރުން ބުނީ މިއީ އެކިއެކި ބޭނުންތަކަށް ލޭ ބޭނުންވާ ބަލިމީހުންނަށް ފަސޭހައިން ލޭ ލިބޭނެ އިންތިޒާމް ހަމަޖެއްސުމުގެ ގޮތުން ޤާއިމްކުރި ބްލަޑް ބޭންކެއްކަމަށެވެ.

ކުޅުދުއްފުށީ ރީޖަނަލް ހޮސްޕިޓަލުގައި ޤާއިމްކުރި ބްލަޑް ބޭންކަކީ ލޭ ރައްކާކޮށްފައި ހުންނަ 200 ޕެކް، ބެހެއްޓޭނެ ޤާބިލްކަން ހުރި ބްލަޑް ބޭންކެކެވެ. ކުޅުދުއްފުށީ ހޮސްޕިޓަލުގައި ބްލަޑް ބޭންކެއް ޤާއިމްކުރުމުގެ މަސައްކަތަކީ އެ ހޮސްޕިޓަލް ތަރައްޤީކުރުމަށް ސަރުކާރުން ކުރަމުންދާ މަސައްކަތުގެ ބައެކެވެ. މީގެއިތުރުންވެސް ސަރުކާރުން އަންނަނީ އާއްމުންނަށް ދޭ ޚިދުމަތްތައް އިތުރުކުރުމަށް ގިނަ މަސައްކަތްކެއް ދަނީ ކުރަމުންނެވެ.

ކުޅުދުއްފުށީ ހޮސްޕިޓަލުން ބުނީ ބްލަޑް ބޭންކަކީ މިހާރު އެ ހޮސްޕިޓަލަށް ވަރަށް މުހިއްމު ހިދުމަތެއްކަމަށެވެ. ސަބަބަކީ އެ ހޮސްޕިޓަލުން މިހާރު ކުދިކުދި ގިނަ އޮޕަރޭޝަންތަކާއި މާބަނޑު މީހުންގެ ސިޒޭރިއަން ހަދަންޖެހުމެވެ. އަދި މި ބްލަޑް ބޭންކާއިއެކު އެމަޖެންސީ ހާލަތްތަކުގައި ބޭނުންވާ ލޭ ލިބުމުގައި ކުރިމަތިވާ ދަތިތަކަށް ބްލަށް ބޭންކާއެކު ވަރަށް ބޮޑު ލުޔެއް ލިބިގެންދާނޭކަމަށެވެ.

ހޮސްޕިޓަލުން ހާމަކުރީ ލޭ ބޭކާރުވިޔަ ނުދިނުމަށް، އެންމެ މަދުން ހޯދަންޖެހޭ ބައެއް ލޭ ގްރޫޕްތަކުގެ ސްޓޮކް ދަށްކުރުމާއިއެކު ލޭގެ ރައްކާތެރިކަން ކަށަވަރުކުރުމަށް ޚާއްސަ އިސްކަމެއް ދޭނެކަމަށެވެ. ކުޅުދުއްފުށީ ރީޖަނަލް ހޮސްޕިޓަލްއިން ބުނީ، ބްލަޑް ބޭންކާއެކު ލޭ އަޅާ ކުދިންނަށް ދޭ ޚިދުމަތްވެސް އަވަސްވެއްޖެކަމަށެވެ. އެގޮތުން ކުރިން ޑޯނަރުގެ ގައިން ލޭ ނެގުމަށްފަހު ބަލި މީހާގެ ގަޔަށް ލޭ އަޅަން 12 ގަޑިއިރު ހޭދަވިނަމަވެސް، މިހާރު އެ ވަގުތު 4 ގަޑިއިރަށް ކުޑަވެފައިވާކަންވެސް ކުޅުދުއްފުށީ ރީޖަނަލް ހޮސްޕިޓަލްއިން ފާހަގަކުރެއެވެ.